Atyraýdaǵy dombyra pishindi kontsert zaly: 2,5 mlrd teńge ıgerildi, qalǵany bólinbegen
ATYRAÝ.KAZINFORM — Atyraýda 1200 oryndyq kontsert zalynyń qurylysyn merdiger mekeme óz qarajatyna salyp jatyr. Búginde ákimdikten bólingen 2,5 mlrd teńge tolyq ıgerilgen. Qosymsha qarjy áli qaralmaǵan.
Joba jetekshisi Amandyq Qaparovtyń aıtýynsha, qarjy máselesi búginde ózekti. Alańda qurylys jumysy júrip jatyr. Qazir nysan basynda 70 adam eńbek etip jatyr. Jobanyń jalpy quny 68 mlrd teńge. Al bólinip, ıgerilgeni 2,5 mlrd teńgege jýyqtaıdy. Qarjy ýaqytyly bólinbese qurylystyń ýaqytsha toqtap qalý qaýpi bar.
— Kompanııa óz qarajatyn salǵannyń ózinde onyń qashan qaıtarylatyny jóninde másele bar. Bul kommertsııalyq suraq, — dep pikir bildirdi Amandyq Qaparov.
Al bul jobaǵa taptyrys berýshi oblystyq qurylys, sáýlet jáne qala qurylysy basqarmasynyń ókilderi bıyl qazynadan jobaǵa qajetti qarjynyń teń jartysy suraldy dep otyr.
— Joba qajetti qarjynyń jartysyn suratyp qoıdyq. Qarajat tek oblystyq bıýdjetten ǵana emes, respýblıkadan bóliný múmkin. Qazir merdiger óziniń qarjysyn da quıyp jatyr. Bizdiń bergen aqshany da paıdalanyp jatyr, — dedi basqarmanyń bólim basshysy Altynbek Qýanǵalı.
Ótken jyldyń sońynda bastalǵan qurylystyń nátıjesinde 2028 jyly oblystyq tarıhı-ólketaný mýzeıi men batys óńirinde teńdesi joq kontsert zaly boı kóterýi tıis. Murajaı 4, al kontsert zaly 3 qabattan turady. Eki nysandy dombyra pishindes erekshe ǵımarat baılanystyryp, kirý aımaǵy bolady. Bıiktigi 40 metr bolatyn ǵımarattyń eń joǵary qabatynda aınalany tamashalaýǵa múmkindik beretin alań qarastyrylady.
Búginde úsh ǵımarattyń negizin salý jumysy aıaqtalyp, beton quıylǵan. Metall konstrýktsııalar salynyp jatyr.
— Vıtrajdy, ıaǵnı áınekpen qaptalady. Bıyl jyl sońyna deıin ár ǵımarattaǵy qabattardy kóterip, ınjenerlik jelilerdi júrgizýdi josparlap otyrmyz, — dedi joba jetekshisi Amandyq Qaparov.
Bul jobada avtoturaq máselesi ózekti. Ǵımarat aınalasynda 200-ge jýyq kólikke arnalǵan turaq orny bolady degen jospar bar.
— Jobada ǵımarattyń astyńǵy qabatynda turaq qarastyrylmaǵan. Jalpy turaq sanyn kóbeıtý máselesi kóterildi. Alaıda bul suraq áli ashyq kúıde tur. Bul nysanǵa barlyǵy birdeı kólikpen kelmeıtinin aıta ketken jón, — dedi oblystyq qurylys, sáýlet jáne qala qurylysy basqarmasynyń bólim basshysy Altynbek Qýanǵalı.
Bul jobanyń tamyry tereńde jatyr. Osy aýmaqta 2011 jyly bastalǵan kınokontsert zalynyń qurylysy saǵyzsha sozylyp, toqtap qalǵan edi. 2014 jyly oblystyq máslıhat qurylysty jalǵastyrý tıimsiz degen sheshim qabyldady.
Budan keıin sheteldik ınvestor kontsert zalyn bıznes ortalyqqa aınaldyrýǵa nıet bildirdi.
Aıaqsyz qalǵan qurylysty «Atyraý» áleýmettik-kásipkerlik korporatsııasy» AQ-nyń balansyna berý rásimi júrgizilgen edi.
2022 jyly óńirge jumys saparymen kelgen memleket basshysy jobany birjaqty etýdi tapsyrdy. Bir jyldan keıin jergilikti bılik eki ǵımarattyń buzylatynyn málimdedi. Demontaj aıaqtalǵannan keıin jańa zaldyń jobasy jasaqtalyp, ótken jyly qurylysy bastaldy.
Aıta keteıik, ǵımarattyń jalpy qurylys alańy — 38 173 sharshy metr. Mádenı keshen úsh fýnktsıonaldy bloktan turady.
