Atyraýdaǵy bútin bir otbasynyń ólimi: Sarsemalıevke taǵylǵan aıyp qatańdatyldy
ATYRAÝ. KAZINFORM — Atyraýda áıeliniń ata-anasy men baýyrlaryn óltirdi dep aıyptalǵan Sultan Sarsemalıevke qatysty sotta memlekettik aıyptaýshy aıyptaý aktisine ózgeris engizdi.
Sot otyrysynda prokýror Sultan Sarsemalıevke buǵan deıin taǵylǵan aıyptarǵa qosymsha jańa baptar engizilgenin málimdedi. Atap aıtqanda, oǵan QR Qylmystyq kodeksiniń 190-baby 2-bóliginiń 4-tarmaǵy boıynsha aqparattyq júıeni nemese ınternet jelisin paıdalaný arqyly jasalǵan alaıaqtyq deregi qosyldy. Memlekettik aıyptaýshynyń aıtýynsha, aıyptalýshy qaza bolǵandardyń bank qosymshalaryn paıdalanyp, olardyń qarajaty men zeınetaqysyn ıemdengen.
Sondaı-aq Maqsot Qarabalın men Násip Óteshqalıevanyń ólimine qatysty aıypqa QR Qylmystyq kodeksiniń 99-baby 2-bóliginiń 10-tarmaǵy (Basqa qylmysty jasyrý nemese ony jasaýdy jeńildetý maqsatymen jasalǵan, sol sııaqty zorlaýmen nemese seksýaldyq sıpattaǵy zorlyq-zombylyq áreketterimen ushtasqan adam óltirý) engizildi.
Al Meıramgúl Qarabalınany óltirý epızody boıynsha aıyp QR Qylmystyq kodeksiniń 99-baby 2-bóliginiń 3 tarmaǵymen (dármensiz kúıdegi adamdy qasaqana óltirý) jáne 10-tarmaǵymen (Basqa qylmysty jasyrý nemese ony jasaýdy jeńildetý maqsatymen jasalǵan, sol sııaqty zorlaýmen nemese seksýaldyq sıpattaǵy zorlyq-zombylyq áreketterimen ushtasqan adam óltirý) tolyqtyryldy. Buǵan deıin taǵylǵan 5 jáne 13-tarmaq ózgerissiz qaldy.
Buǵan deıin Sultan Sarsemalıev qaıynaǵasy Naýryzdy Muqanǵalıevti ózin qorǵaý maqsatynda óltirgenin aıtqan bolatyn. Alaıda memlekettik aıyptaýshy bul epızod boıynsha ustanymyn ózgertpeı, qylmys qasaqana jasalǵan degen aıypty sol kúıinde qaldyrdy.
Sot barysynda memlekettik aıyptaýshy mal satýǵa qatysty burynǵy alaıaqtyq aıybynyń da ózgertilgenin habarlady.
— Sonymen qatar buryn kúdiktige mal satý aıyby «alaıaqtyq» bolǵan, ony qazir memlekettik aıyptaýshy «mal urlyǵyna» aýystyryp otyr. Jańa aıyptaý boıynsha jazańyzdy jeńildetetin mán-jaılardy memlekettik aıyptaýshy alyp tastaǵan, — dep túsindirdi sýdıa Zarema Hamıdýllına.
Otyrys kezinde memlekettik aıyptaýshy oqıǵanyń mán-jaıyn baıandap, Sultan Sarsemalıev pen Aqbaıan Muqanǵalıevanyń 2022 jyly zańdy túrde ajyrasýyna aıyptalýshynyń opasyzdyq jasaýy sebep bolǵanyn aıtty. Jábirlenýshi taraptyń advokaty bul derektiń sol jyly aýdandyq sottyń sheshimimen rastalǵanyn jetkizdi.
— Mahambet aýdandyq sotynyń 2022 jylǵy sheshimin jáne ony is materıaldaryna tirkeýdi suradyq. Sol kezde Aqbaıannyń aqyl-esi durys bolǵany, nekeni buzýǵa óz erkimen aryz bergeni jazylǵan. Sondaı-aq sot sheshiminde Sarsemalıevtiń otbasyna opasyzdyq jasaǵanyn ózi moıyndap, otbasyna berik bolmaǵany kórsetilgen, — dep pikir bildirdi jábirlenýshi taraptyń advokaty Shynar Nurmuratqyzy.
Sot jańa aıyptaý aktisimen tanysý úshin taraptarǵa ýaqyt berdi. Kelesi sot otyrysy 7 shildege belgilendi. Sol kúni taraptardyń jaryssózi bastalady.
Eske salsaq, Jangeldın aýylynda turatyn otbasy 2025 jyldyń sońynda belgisiz jaǵdaıda joǵalyp ketkeni habarlandy. 6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan. Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.
Ótken joly Sultan Sarsemalıev óz telefonynda saqtalǵan aýdıojazbany dálel retinde usynyp, ony marqum Naýryz Muqanǵalıev tarapynan aıtylǵan qoqan-loqqymen baılanystyrǵan edi. Sonymen qatar, aıyptalýshy sotta qaıynaǵasyn qasaqana emes, ózin-ózi qorǵaý maqsatynda óltirgenin málimdedi.
Jábirlenýshi tarap kúdiktiden 70 mln teńge moraldyq ótemaqy talap etti.
Sot protsesi kezinde is boıynsha jınalǵan zattaı dálelder kórsetildi. Olardyń qatarynda marqumdardyń jeke qujattary, bank kartalary, baılanys quraldary jáne qylmysqa qatysty basqa da aıǵaqtar bar.
Sondaı-aq Sultan Sarsemalıevtiń tergeý kezindegi vıdeosy kórsetildi. Onda ol qylmysty jasyrýǵa sheshim qabyldaǵanyn jáne qaıynapasynyń jaǵdaıyna alańdamaǵanyn aıtqan.
Aqbaıan Muqanǵalıevanyń da tergeý kezinde ne aıtqany belgili boldy. Marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.
Aıta keteıik, kúdikti ata-enesin óltirgennen keıin enesiniń altyndaryn lombardqa ótkizgen.
Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty.
Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.
