Atyraýdaǵy bútin bir otbasynyń ólimi: Aqbaıan Muqanǵalıeva psıhıkalyq ortalyqtan shyqty
ATYRAÝ. KAZINFORM — Atyraýda atyshýly qylmystyq is boıynsha ómir boıyna bas bostandyǵynan aıyrylǵan Sultan Sarsemalıevtiń áıeli Aqbaıan Muqanǵalıeva psıhıkalyq densaýlyq ortalyǵynan shyǵaryldy. Keıin ol kámeletke tolmaǵandardy beıimdeý ortalyǵyna, sábıler úıine baryp, balalarymen kezdesken.
Atyraý oblysynyń kámeletke tolmaǵandardy beıimdeý ortalyǵynyń dırektory Qundyz Ǵınııatovanyń aıtýynsha, Aqbaıan Muqanǵalıeva balalarymen alǵash ret ótken aptada kezdesken. Ekinshi ret 1 qyrkúıek kúni júzdesken.
— Balalarynyń zańdy ókili retinde balalaryna keldi. Ata-ana retinde quqyǵynan aıyrylǵan joq. Jalpy balalarmen kezdesý kestege sáıkes ár juma kúni, 17:00 men 19:00 aralyǵynda uıymdastyrylady. Muny ol basynda bilmegen. 27 tamyzda keldi. Keıin balalaryn bilim kúnimen quttyqtaýǵa kelgenin aıtyp, 1 qyrkúıekte kezdesti, — dedi ortalyq dırektory.
Qazir onyń tórt balasy Atyraý oblysynyń kámeletke tolmaǵandardy beıimdeý ortalyǵynda turyp jatyr. Balalar ortalyq qabyrǵasynda bilim alady. Al bir jarym jastaǵy kenje uly sábıler úıinde tárbıelenip jatyr.
— Balalardyń densaýlyq jaǵdaıy, kóńil-kúıi — jaqsy. Kishkentaılardy ortalyqqa ornalastyrý týraly sheshimde olardyń qaı ýaqytqa deıin munda bolatyny kórsetilmegen, — dep tolyqtyrdy Qundyz Ǵınaıatova.
Aqbaıan Muqanǵalıevanyń týystarynyń aıtýynsha, ol balalaryn tanıdy. Degenmen em alýyn aldaǵy ýaqytta da jalǵastyrady.
Eske salaıyq, shildede ata-enesin jáne áıeliniń baýyrlaryn óltirdi dep aıyptalǵan Sultan Sarsemalıevke úkim shyǵyp, ol ómir boıyna bas bostandyǵynan aıyrylǵan edi.
Tergeý barysynda Aqbaıan Muqanǵalıevanyń adam óltirý faktisine qatysy joq ekeni belgili boldy.
Sondaı-aq Aqbaıan Muqanǵalıevaǵa qatysty «burynǵy kúıeýi Sultan Sarsemalıevtiń asa aýyr qylmysyn jasyrdy» degen kúdik rastalmady. Tergeý barysynda onyń kinási dáleldenbeı, qylmystyq is toqtatyldy. Prokýratýra aqparatyna súıensek, Almatyda júrgizilgen statsıonarlyq keshendi sot-psıhologııalyq-psıhıatrııalyq saraptamanyń qorytyndysyna sáıkes, Aqbaıan Muqanǵalıevaǵa dınamıkalyq baqylaý júrgizý jáne qosymsha dıfferentsıaldyq dıagnostıka qajet dep tanylǵan edi.
Aıta keteıik, sottyń sheshimine qatysty appelıatsııalyq shaǵym túsirildi. Oblystyq sottyń baspasóz qyzmetiniń málimetine súıensek, shaǵymdy ekinshi deńgeıli bankterdiń biri bergen. Sultan Sarsemalıev qaıynaǵasyn pyshaqtap óltirgennen keıin bank qosymshasy arqyly onyń atynan 4 mln teńge kóleminde taýarly nesıe rásimdegen.
