Atyraýdaǵy bútin bir otbasy ólimi: Sultan Sarsemalıev ómir boıyna bas bostandyǵynan aıyryldy

Úkimdi qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına oqydy.

Jábirlenýshi tarapqa 40 mln teńge moraldyq ótemaqy tóleý mindetteldi.

Ol qaýipsizdigi erekshe túzetý mekemesinde jazasynda óteıtin boldy.

Іsti qaraý barysynda otbasyǵa kúıeýbala esepteletin kúdikti marqumdardy qatigezdikpen óltirip, birneshe márte pyshaqtaǵan. Aldymen qaıynaǵasy Naýryz Muqanǵalıevti ótken jyldyń mamyr aıynda óltirip, úı irgesine kómip, keıin onyń telefony arqyly Naýryz bolyp aǵaıyn-týyspen baılanysyp otyrǵan. 

Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Keıin Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy. 

Alǵashynda kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.

Sotta memlekettik aıyptaýshy aıyptaý aktisine ózgeris engizdi.

Atap aıtqanda, oǵan QR Qylmystyq kodeksiniń 190-baby 2-bóliginiń 4-tarmaǵy boıynsha aqparattyq júıeni nemese ınternet jelisin paıdalaný arqyly jasalǵan alaıaqtyq deregi qosyldy. Memlekettik aıyptaýshynyń aıtýynsha, aıyptalýshy qaza bolǵandardyń bank qosymshalaryn paıdalanyp, olardyń qarajaty men zeınetaqysyn ıemdengen. Sondaı-aq Maqsot Qarabalın men Násip Óteshqalıevanyń ólimine qatysty aıypqa QR Qylmystyq kodeksiniń 99-baby 2-bóliginiń 10-tarmaǵy (Basqa qylmysty jasyrý nemese ony jasaýdy jeńildetý maqsatymen jasalǵan, sol sııaqty zorlaýmen nemese seksýaldyq sıpattaǵy zorlyq-zombylyq áreketterimen ushtasqan adam óltirý) engizildi.

Al Meıramgúl Qarabalınany óltirý epızody boıynsha aıyp QR Qylmystyq kodeksiniń 99-baby 2-bóliginiń 3 tarmaǵymen (dármensiz kúıdegi adamdy qasaqana óltirý) jáne 10-tarmaǵymen (Basqa qylmysty jasyrý nemese ony jasaýdy jeńildetý maqsatymen jasalǵan, sol sııaqty zorlaýmen nemese seksýaldyq sıpattaǵy zorlyq-zombylyq áreketterimen ushtasqan adam óltirý) tolyqtyryldy. Buǵan deıin taǵylǵan 5 jáne 13-tarmaq ózgerissiz qaldy.

Buǵan deıin Sultan Sarsemalıev qaıynaǵasy Naýryzdy Muqanǵalıevti ózin qorǵaý maqsatynda óltirgenin aıtqan bolatyn. Alaıda memlekettik aıyptaýshy bul epızod boıynsha ustanymyn ózgertpeı, qylmys qasaqana jasalǵan degen aıypty sol kúıinde qaldyrdy.
Sot barysynda memlekettik aıyptaýshy mal satýǵa qatysty burynǵy alaıaqtyq aıybynyń da ózgertilgenin habarlady.

Jaryssózde Sultan Sarsemalıevti ómir boıyna bas bostandyǵynan aıyrýdy surady. 

Al kúdikti ózine taǵylǵan 13 epızod boıynsha aıybyn moıyndaıtynyn aıtyp, ómir boıyna bas bostandyǵynan aıyrýdyń ornyna 25 jyl merzimge sottaýdy surady.

Tergeý barysynda marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy. 

Ótken aıdyń sońynda Aqbaıan Muqanǵalıevaǵa qatysty «burynǵy kúıeýi Sultan Sarsemalıevtiń asa aýyr qylmysyn jasyrdy» degen kúdik rastalmady. Tergeý barysynda onyń kinási dáleldenbeı, qylmystyq is toqtatyldy. Prokýratýra aqparatyna súıensek, Almatyda júrgizilgen statsıonarlyq keshendi sot-psıhologııalyq-psıhıatrı

ıalyq saraptamanyń qorytyndysyna sáıkes, Aqbaıan Muqanǵalıevaǵa dınamıkalyq baqylaý júrgizý jáne qosymsha dıfferentsıaldyq dıagnostıka qajet dep tanylǵan. Qazirgi ýaqytta ol tıisti em qabyldap jatyr.

Sot protsesi ashyq formatta ótti. 26 kýáden jaýap alyndy. Olardyń arasynda marqumdardyń týystary, kórshileri, kúdiktiniń jaqyndary, Jangeldın aýylynda mal baqqan azamattar bar. 

Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty. 

Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys. 

Eske salsaq, Qyzylqoǵa aýdany Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi. 

6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy. 

9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy. 

Kúdiktiler aqpan aıynyń sońynda Indonezııa Respýblıkasynyń Lombok aralyndaǵy Senarý aýylynda asa aýyr qylmys jasady dep kúdikke ilingender ustalǵan edi.