Atyraýdaǵy burynǵy saltanat saraıynyń taǵdyry ne bolmaq
ATYRAÝ. KAZINFORM – Atyraý qalasyndaǵy saltanat saraıyn rekonstrýktsııalaý jumysy 2 jylǵa jýyq ýaqyttan beri toqtap tur. Oǵan qurylys-montaj jáne demontaj jumystarynyń barysynda bekitilgen jobalyq qujattamada eskerilmegen qosymsha ınjenerlik-geologııalyq jáne konstrýktıvtik mán-jaılardyń anyqtalýy sebep.
Naqtyraq aıtqanda, jer asty sýlary deńgeıiniń joǵarylaýy, sondaı-aq ǵımarattyń senimdiligi, ornyqtylyǵy jáne qaýipsiz paıdalanylýyn qamtamasyz etý maqsatynda konstrýktıvtik ózgerister engizý qajettiligi týyndaǵan. Qazirgi ýaqytta nysan bekitilgen smetalyq qunyn ózgertpeı jobalaý-smetalyq qujattamany túzetý kezeńinde tur.
- Musa Baımuhanov kóshesinde ornalasqan nysandy D. Nurpeıisova atyndaǵy qazaq halyq aspaptary akademııalyq orkestriniń ǵımaratyna beıimdep qaıta jańǵyrtý jobasyna «Dekor» JShS jaýapty. Qurylys-montaj jumystary 2024 jylǵy 22 sáýirde bastaldy.Qoldanystaǵy zańnamaǵa sáıkes barlyq qajetti jobalaý jáne kelisý rásimi júrgizilýde. Jobalaý-smetalyq qujattamaǵa túzetýler engizý úshin saraptamaǵa joldandy,-dep málimdedi oblystyq qurylys, sáýlet jáne qala qurylysy basqarmasy.
2024 jyldyń jazynda nysannyń artqy bóligi jáne aýmaǵyndaǵy qosymsha ǵımarattar tolyqtaı buzyldy. Birneshe aıdan keıin qurylys aýmaǵynda jumys toqtap qaldy. Jospar boıynsha jańǵyrtý jumysy 2024 jyldyń qarasha aıynda aıaqtalýy tıis edi.
Alǵashyndaǵy joba boıynsha buzylǵan bóliktiń ornyna kontsert zaly , ǵımarattyń buzylmaıtyn negizgi bóliginiń irgetasy nyǵaıtylyp, qabyrǵasy qaptalýy qajet edi . Jalpy negizgi bólikte birneshe kabınet, nysan aýlasynda kir jýatyn oryn men jóndeý sheberhanasy ornalasatyn ǵımarat salynýy kerek. Jalpy ǵımarattyń kólemi 1284 sharshy metrdi quraıdy.
Jospar boıynsha túzetýler engizilgen jobalyq-smetalyq qujat saraptamadan ótkennen keıin qurylys jumysy jandanyp, 7 aı ishinde aıaqtalýy kerek.
Ákimdik bul ǵımaratty rekonstrýktsııadan ótkizgennen keıin D.Nurpeıisova atyndaǵy akademııalyq qazaq halyq aspaptar orkestrine bermek. Óıtkeni, atalǵan óner ujymynyń ákimshilik qyzmetkerleri Ǵabdol Slanov atyndaǵy atyraý oblystyq ǵylymı ámbebap kitaphanasynda otyrsa, shyǵarmashylyq quram oblystyq halyq shyǵarmashylyǵy ortalyǵynyń ǵımaratynda jumys isteıdi.
Aıta keteıik, 1955 jyly salynǵan ǵımarat Atyraý oblysy boıynsha tarıhı-mádenı mura obektileriniń aldyn-ala esepke alý tizimine engen.
Buǵan deıin Atyraý qalasyndaǵy «Birlik-2» yqsham aýdanynda 600 oryndyq mekteptiń qurylysy 2 jyldan beri toqtap turǵanyn jazǵan edik.