Atyraýdaǵy bir otbasynyń ólimi: Saraptama Sultan Sársemalıevti deni saý dep tanydy
ATYRAÝ.KAZINFORM - Atyraý oblysy Jangeldın aýylynda bolǵan jaǵdaıǵa baılanysty otbasy músheleriniń qashan óltirilgeni belgili boldy. Sot medıtsınalyq saraptamasynda jáne tergeý barysynda anyqtalǵan dálelderge sáıkes Naýryz Muqanǵalıevtiń 2025 jyldyń mamyr aıynda qaıtys bolǵany anyqtaldy. Al qalǵan úsheýi qarasha aıynda kóz jumǵan.
Atyraý oblysy prokýrorynyń kómekshisi Jandar Bolatbektiń aıtýynsha, barlyq jábirlenýshiniń denesinen as úı pyshaǵymen tesilgen dene jaraqaty anyqtaldy. Jaraqattyń sany alty jáne odan da kóp. Kesilgen jáne tesilgen dene jaraqattary ólimge sebep bolǵan.
4 azamattyń ólimine kúdikti dep tanylǵan Sultan Sarsemalıevke júrgizilgen saraptamanyń nátıjesinde onyń aqyl-esi durys ekeni belgili boldy. Al onyń áıeli Aqbaıan Muqanǵalıevanyń psıhıkalyq jaı-kúıine taǵaıyndalǵan sarapta áli júrgizilip jatyr. Ol qazir Almaty oblysyndaǵy arnaıy ortalyqta jatyr.
- Aqbaıan Muqanǵalıeva qatysty qorytyndy shyqqan joq. Ol kúdikti retinde tanylǵan. Bultartpaý sharasy qabyldanǵan joq. Іs-áreketi saralanǵan joq. Saraptama bir aı kóleminde júrgiziledi. Ol ýaqyttan da uzaryp ketýi múmkin, - dedi oblys prokýrorynyń kómekshisi Jandar Bolatbek.
Qylmysty jasaýǵa otbasylyq janjal sebep bolǵan.
- Aqbaıannyń jaqyndary men Sultan Sarsemalıevtiń arasynda kıkiljiń bolǵan. Qazirgi ýaqytta bul qylmysqa basqa tulǵalardyń qatysy anyqtalǵan joq, - dedi oblys prokýrorynyń kómekshisi Jandar Bolatbek.
Sultan Sarsemalıev jeltoqsan aıynda shekara asyp ótken. ıAǵnı, qylmys týraly habarlanǵan kezde el aýmaǵynda bolmaǵan.
- Shekaradan zańdy ótken. Shekara qyzmetshileriniń tarapynan eshqandaı zańbuzýshylyq anyqtalmady, - dep tolyqtyrdy prokýratýra ókili.
Aıta keteıik, kúdikti Sultan Sarsemalıevke qatysty QR Qylmystyq kodeksiniń 99 baby 2 bóliginiń 1 tarmaǵyna sáıkes, ıaǵnı eki jáne odan da kóp adamdardyń ólimi boıynsha qylmystyq is tergelip jatyr. Sondaı-aq mal satý, kartalardy jymqyrý syndy derekteri boıynsha QR Qylmystyq kodeksiniń 188 jáne 190 baby boıynsha qosymsha qylmystyq is tirkeldi.
Prokýratýra ókilderiniń sózinshe, qylmystyq is jan-jaqty tergep tekserilip jatyr. Kúdiktilerdiń is-áreketine taǵaıyndalǵan barlyq saraptama qorytyndysy shyqqannan keıin anyqtalǵan barlyq mán-jaı zerdelenip, quqyqtyq baǵa beriledi. Sodan keıin ǵana naqty aıyp taǵylady. Ázirge istiń sotqa qashan jiberiletini belgisiz.
Naýryz aıynda aıyptalýshy sot sanktsııasymen eki aıǵa qamaýǵa alynǵan edi.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denesinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Qandy qylmysqa qatysy bolýy múmkin degen kúdikke sol úıdiń qyzy da ilindi.
Kúdiktiler aqpan aıynyń sońynda Indonezııa Respýblıkasynyń Lombok aralyndaǵy Senarý aýylynda asa aýyr qylmys jasady dep kúdikke ilingender ustalǵan edi.
Eki kúdiktiniń shetelde qalaı ustalǵany jóninde vıdeo jarııalandy.
Birneshe kúnnen keıin olar Atyraý qalasyna jetkizildi.
Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.
Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady. 29 jastaǵy kúdikti burynǵy áıeliniń aǵasy Naýryz Muqanǵalıev pen Meıramgúl Qarabalınany sol jerge kómip ketken.
