Atyraýdaǵy bir otbasynyń ólimi: alǵashqy sot otyrysy 18 mamyrǵa josparlandy
ATYRAÝ. KAZINFORM – Atyraý oblysynda eldi eleń etkizgen qandy qylmysqa qatysty sot protsesi bastalmaq. Qyzylqoǵa aýdany Jangeldın aýylynda bir otbasynyń tórt múshesiniń ólimine baılanysty qozǵalǵan qylmystyq is sotqa joldandy.
Alǵashqy sot otyrysy 18 mamyr kúni saǵat 11:00-ge josparlanyp otyr. Іs ashyq formatta qaralady. Bul aqparatty oblystyq sottyń baspasóz qyzmeti rastady.
Іsti Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına qaraıdy.
Ótken aptada Sultan Sarsemalıevke qatysty sotqa deıingi tergep-tekserý aıaqtaldy.
Eske salaıyq, kúdiktige qatysty QR Qylmystyq kodeksiniń 99-baby 2-bóliginiń 1-tarmaǵy boıynsha eki nemese odan da kóp adamdy óltirý deregimen, sondaı-aq 188 jáne 190-baptaryna sáıkes mal urlaý jáne bank kartalaryn jymqyrý faktileri boıynsha qylmystyq is qozǵalǵan edi.
Buǵan deıin sot medıtsınalyq saraptamasy men tergeý barysynda anyqtalǵan dálelderge sáıkes Naýryz Muqanǵalıevtiń 2025 jyldyń mamyr aıynda qaıtys bolǵany anyqtaldy. Al qalǵan úsheýi qarasha aıynda kóz jumǵan.
Saraptama Sultan Sársemalıevti deni saý dep tanyǵan edi.
Naýryz aıynda aıyptalýshy sot sanktsııasymen eki aıǵa qamaýǵa alyndy.
Kópti shoshytqan qandy qylmys týraly alǵash ret Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketkennen keıin belgili boldy.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni anyqtaldy.
Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Qandy qylmysqa qatysy bolýy múmkin degen kúdikke sol úıdiń qyzy da ilindi.
Kúdiktiler aqpan aıynyń sońynda Indonezııa Respýblıkasynyń Lombok aralyndaǵy Senarý aýylynda asa aýyr qylmys jasady dep kúdikke ilingender ustaldy.
Eki kúdiktiniń shetelde qalaı ustalǵany jóninde vıdeo jarııalandy.
Birneshe kúnnen keıin olar Atyraý qalasyna jetkizildi.
Keıin polıtsııa Atyraý oblysy Jangeldın aýylynda bútin bir otbasyn óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.
Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady. 29 jastaǵy kúdikti burynǵy áıeliniń aǵasy Naýryz Muqanǵalıev pen Meıramgúl Qarabalınany sol jerge kómip ketken.
