Atyraýdaǵy «Bolashaq» qondyrǵysynyń aýmaǵynda qansha kúkirt jınaýly tur
ATYRAÝ. KAZINFORM — Kaspıı teńizindegi «Qashaǵan» ken ornynan óndirilgen munaı «Bolashaq» qondyrǵysynda gaz ben kúkirtten tazartylady. Munda qazir kúkirt taý sekildi jınaýly tur.
Al, «Bolashaq» munaı men gazdy daıyndaý qondyrǵysy Atyraý oblysynyń Maqat aýdany aýmaǵynda ornalasqan. Qarabatan eldi mekeni tusyndaǵy qondyrǵy men Atyraý qalasynyń aralyǵy — shamamen 35 shaqyrym.
Áleýmettik jeli men telegram arnalarynda «Bolashaq» qondyrǵysynyń aýmaǵynda kúkirttiń jınaýly turǵany jóninde foto júkteldi.
Máseleniń mán-jaıyn bilý úshin Atyraý oblystyq ekologııa departamentiniń baspasóz qyzmetine habarlasqan edik.
— Ekologııalyq ınspektsııa 2022 jyly North Caspian Operating Company N.V. (NCOC) kompanııasynyń jerústi keshenin tekserý nátıjeleri boıynsha birneshe buzýshylyqty anyqtady. Birinshiden, ruqsat etilgen 730 tonna kúkirttiń ornyna 1,7 mln tonna kúkirt ornlastyrylǵan. Normadan artyǵy — 1,02 mln tonna kúkirt. Ekinshiden, qorshaǵan ortany qorǵaý sharalary oryndalmaǵan. Úshinshiden, ekologııalyq ruqsatsyz sarqyndy sýlardy aǵyzǵan. Tórtinshiden, memlekettik ekologııalyq saraptamanyń qorytyndysynda qamtylǵan talaptar saqtalmaǵan, — dep habarlady departamenttiń baspasóz qyzmeti.
NCOC kompanııasy tekserý nátıjelerimen kelispeı, Astana qalalyq sotyna shaǵym túsirgen. Sot kompanııanyń talap aryzyn ishinara qanaǵattandyryp, uıǵarymdaǵy 10 tarmaqtyń 3-eýi zańsyz dep tanylǵan.
— Astana qalasynyń ákimshilik ister jónindegi sot alqasy 2024 jylǵy 27 aqpanda ekologııa departamentiniń shaǵymy tolyǵymen qanaǵattandyrdy. Tabıǵat qorǵaý ınspektorlary uıǵarymynyń barlyq tarmaǵy zańdy dep tanyldy. NCOC atalǵan sot qaýlysyna qatysty kassatsııalyq shaǵym túsirdi. Qazir bul shaǵym Joǵarǵy sotta qaralyp jatyr, — dep málim etti departamenttiń baspasóz qyzmetinen.
Eske sala keteıik, budan buryn ekologııasy nashar Atyraý oblysynda jasyl jelek qashan kóbeıedi degen másele qozǵalǵan.