Atyraýdaǵy bıyl jóndelgen ortalyq kópirdiń deformatsııalyq jikteri áli aýystyrylǵan joq

ATYRAÝ. KAZINFORM — Atyraýdaǵy ortalyq kópirdiń kólik júretin bóliginde jáne jaıaý júrginshiler jolynda jaryqtar paıda boldy. Birneshe aı buryn jóndelgen kópirdiń deformatsııalyq jikteri áli aýystyrylǵan joq. Qajetti konstrýktsııalar qarasha aıynyń 5-ine deıin jetkiziledi dep josparlanyp otyr.

Atyraýdaǵy bıyl jóndelgen ortalyq kópirdiń deformatsııalyq jikteri áli aýystyrylǵan joq
Vıdeodan alynǵan kadr

Bıyl maýsymda ortalyq kópir men aınalma jol ortasha jóndeýden ótti. Qurylys jumysy kezinde kópir 10 kúnge jabylǵan edi.

Jóndeý jumysy júrgizilgenimen, deformatsııalyq jikterdi aýystyrý keıinge qaldyrylǵan. Kólik qozǵalysyn ýaqytyly ashyp, keptelistiń aldyn alý úshin jikter ornatylatyn tustarǵa ýaqytsha asfalt tóselgen.

Atyraýdaǵy bıyl jóndelgen ortalyq kópirdiń deformatsııalyq jikteri áli aýystyrylǵan joq
Vıdeodan alynǵan kadr

Qala ákimdiginiń málimetinshe, ortalyq kópirdegi uzyndyǵy 16 metr bolatyn 6 deformatsııalyq jikti aýystyrý kózdelgen. Olardyń jalpy uzyndyǵy — 96 metr.

Atyraýdaǵy ortalyq kópirde baıqalǵan jaryqtar deformatsııalyq jikter ornatylatyn tustarda paıda bolǵan. Deformatsııalyq jikter — temperatýranyń ózgerýine jáne kópir qurylymynyń tabıǵı qozǵalysyna beıimdelýge arnalǵan arnaıy metall konstrýktsııalar.

— Qazirgi tańda bas merdiger tarapynan «Tehnonıkol» mekemesimen óz ara kelisimshart jasaqtalyp, qajetti materıaldardyń nysanǵa 5 qarashaǵa deıin jetkizý kútilýde. Materıaldar jetkizilgennen keıin qoldanystaǵy eski deformatsııalyq tigister bólshektelip, olardyń ornyna jańa deformatsııalyq tigister nemese jobalyq jáne tehnologııalyq talaptarǵa sáıkes keletin konstrýktsııalar ornatylady, — dep habarlady qalalyq ákimdik.

Qala bıligi kópirge deformatsııalyq jikter ornatý jumysyn jyl sońynda deıin isteý josparlanyp otyrǵanyn málimdedi. Sondaı-aq, jumys kezinde kópirdegi qozǵalys ýaqytsha toqtatylady.

— Jumys barysynda BP-G-DSh markaly mastıka, praımer jáne «Tehnoelastmost» gıdrooqshaýlaǵysh materıaly qoldanylady. Jóndeý aıaqtalǵan soń kópirdiń atalǵan ýchaskelerindegi asfalt jabyny qaıta tóseledi, -dep tolyqtyrdy ákimdiktiń baspasóz qyzmeti.

Ákimdik ókilderiniń túsindirýinshe, Abaı kóshesin ortasha jóndeý jobasy aıasynda únemdelgen qarajatty ortalyq kópirdiń asfalt jabynyn tolyq aýystyrýǵa baǵyttaý týraly sheshim qabyldanǵan. Al deformatsııalyq jikterdi aýystyrý merdigerge qosymsha tapsyrylǵan.

Buǵan deıin Atyraýdaǵy alty kópirdiń tehnıkalyq jaǵdaıy zertteletinin jazǵan edik. Búginde bul jumys bastalǵan.

«Injınırıngovyı tsentr Azııa Ekspert» JShS kópirge josparly tehnıkalyq zerdeleý júrgizip jatyr. Qorytyndysy qarasha aıynyń sońynda deıin belgili bolady dep josparlanyp otyr.