Atyraýdaǵy beıimdeý ortalyǵynan tárbıelenýshi úsh ret qashyp ketken

ATYRAÝ. KAZINFORM – Bıyl Atyraý oblystyq kámeletke tolmaǵandardy beıimdeý ortalyǵynan qashý deregi alǵash ret tirkeldi. Bir tárbıelenýshi úsh ret qashyp ketken. Onyń ekeýinde jalǵyz ózi ketse, úshinshi jaǵdaıda óziniń qaryndasyn jáne taǵy eki qyz balamen birge ketip qalǵan.

Osy derekterdi negizge alǵan Atyraý qalalyq prokýratýrasy bilim berý basqarmasyna qarasty ortalyqtyń qyzmetine qyzmettik tekseris júrgizip, dırektordyń jaýaptylyǵyn qarastyrý týraly hat joldanǵan. Quqyq qorǵaý organy mekeme basshysyna “qatań sógis” túrindegi tártiptik jaza qoldanylǵanyn málimdedi.

Atyraý oblysy prokýratýrasynyń bergen resmı aqparatyna súıensek, qala prokýratýrasy ýákiletti organdardyń mamandaryn jumyldyra otyryp, prokýrorlyq tekseris taǵaıyndaý josparlanýda.

- Tekserý barysynda ortalyqtyń sanıtarııalyq jaǵdaıy, tótenshe jaǵdaı talaptarynyń saqtalýy, medıtsınalyq qamtamasyz etilýi, qarjylyq-sharýashylyq qyzmeti jáne ózge de zań buzýshylyqtar jan-jaqty zerdelenedi,-dep málimdedi oblys prokýratýrasy.

Oblystyq bilim berý basqarmasynyń josparynda kámeletke tolmaǵandardy beıimdeý ortalyǵyna jańa ǵımarat salý bar. Jańa nysan salý úshin Juldyz-2 yqsham aýdanynan 2,9 gektar jer qaralǵan. Qazir bastamanyń jobalyq-smetalyq qujattamasy jasaqtalyp, memlekettik saraptamadan ótýde. Atyraý oblysy bilim berý basqarmasynyń basshysy Marat Ábýovtyń aıtýynsha, nysan barlyq zamanaýı talapqa saı jabdyqtalady.

- Beıimdeý ortalyǵynyń ǵımaraty 2014 jyly paıdalanýǵa berilgen. 2025 jyly jóndeýden ótti. Beıimdeý ortalyǵy «tıptik úlgide» emes. Jańasy 50 balaǵa arnalady,-dedi bilim berý basqarmasynyń basshysy Marat Ábýov.

Qazir ortalyqta tárbıelenip jatqan bala sany – 25. Onyń úsheýi Atyraý oblysy Jangeldın aýylynda erli-zaıyptyny óltirdi degen kúdikke ilingen Sultan Sársemalıevtiń balasy.