Atyraýdaǵy Azǵyr óńiri áli de Reseıdiń elektr jelisimen jaryq alyp otyr
ATYRAÝ. KAZINFORM — Atyraý oblysynyń Qurmanǵazy aýdanyndaǵy Azǵyr óńirin Qazaqstannyń biryńǵaı elektr jelisine qosý jobasy ázirge jospar kúıinde qalyp otyr. Óńir turǵyndary qazir Reseı Federatsııasy aýmaǵynan keletin elektr jelisine táýeldi.
Qurmanǵazy–Asan baǵyty boıynsha uzyndyǵy shamamen 200–220 shaqyrym bolatyn 110 kV áýe elektr jelisin salý kózdelgen. Bul joba jaıly 2021 jyldan beri aıtylyp keledi. Oblystyq energetıka jáne turǵyn úı-kommýnaldyq sharýashylyq basqarmasy basshysynyń bólim basshysy Asan Nurǵalıevtiń aıtýynsha, qazirgi ýaqytta jańa jelini elektr energııasymen qamtamasyz etýdiń joldary qarastyrylyp jatyr. Ázirge jobanyń naqty quny men qurylystyń bastalý merzimi belgilenbegen. Sońǵy esep boıynsha ony júzege asyrý úshin keminde 20 mlrd teńge qajet.
— Jobanyń negizgi maqsaty — Azǵyr óńirin turaqty jáne senimdi elektr energııasymen qamtamasyz etý, elektr energııasynyń sapasy men senimdiligin arttyrý, sondaı-aq elektrmen jabdyqtaýdaǵy avarııalyq jáne tehnologııalyq úzilisterdiń aldyn alý. Joba aıasynda Qurmanǵazy-Asan baǵyty boıynsha uzyndyǵy shamamen 200–220 shaqyrym bolatyn 110 kV áýe elektr jelisin salý kózdelgen. Joba EPC-kelisimshart (tolyq bitirip beriletin qurylys týraly shart) negizinde iske asyrylady, — dep habarlady basqarma.
«Atyraý Jaryq» JShS-niń málimetine sáıkes, Azǵyr óńiri búginde Reseı Federatsııasynyń Joǵarǵy Baskýnchak qosalqy stansasynan tartylǵan 110 kV elektr jelisi arqyly qamtylyp otyr. Reseıden keletin elektr jelisiniń jalpy uzyndyǵy 80 shaqyrymdy quraıdy. Onyń 38 shaqyrymy Reseı aýmaǵynda, 42 shaqyrymy Qazaqstan aýmaǵynda ornalasqan. Azǵyr aımaǵynda tórt qosalqy stansa jumys isteıdi. Onyń ekeýi — 110 kV, qalǵan ekeýi — 35 kV. «Atyraý Jaryq» JShS bas ınjeneri Qýat Sısenǵalıevtiń aıtýynsha, Azǵyr óńiri bir ǵana elektr jelisi arqyly qorektenetindikten, qolaısyz aýa raıy kezinde apattyq ajyratýlar jıi kezdesedi. Reseı aýmaǵyndaǵy qosalqy stansada aqaý bolǵan jaǵdaıda Súıindik, Balqudyq, Asan aýyldary elektr jaryǵynsyz qalady.
— Elektr jelisiniń uzyndyǵy kerneý qýatyna da áser etedi. Sondyqtan ákimdiktiń jobasy jan jaqty saralanǵany jón, — dep pikir bildirdi Qýat Sısenǵalıev.
Kompanııanyń deregine sáıkes, 2026 jyldyń basynan beri Azǵyr aımaǵynda elektrmen jabdyqtaý júıesinde 11 tehnologııalyq buzýshylyq tirkelgen. Onyń ishinde 3 jaǵdaı Reseı Federatsııasy tarapynan bolǵan ajyratýlarǵa, 8 jaǵdaı «Atyraý Jaryq» JShS-niń elektr jelilerindegi aqaýlarǵa baılanysty bolǵan.
Atyraý Jaryq mekemesiniń aqparatyna súıinsek, Azǵyr aımaǵynda 10 kV áýe elektr jelisiniń 12 shaqyrymyna, 0,4 kV jelisiniń 6,57 shaqyrymyna kúrdeli jóndeý júrgizildi. Sondaı-aq 10/0,4 kV bolatyn úsh keshendi transformatorlyq qosalqy stansa jóndeldi.
Aıta keteıik, qazirgi ýaqytta oblys ortalyǵynan 300-ge jýyq shaqyrym qashyqtyqta ornaldasqan Azǵyr aımaǵyna qarasty eldi mekenderde 1290 abonent bar. 78 zańdy tulǵa men 112 bıýdjettik uıym tirkelgen. Ótken jyly jeke tulǵalardyń elektr energııasyn tutyný kólemi 2 mln 300 myń kılovatt-saǵatty, al zańdy tulǵalardyń tutynýy 2 mln 600 myń kılovatt-saǵatty qurady.
Buǵan deıin Almatyda aptap ystyqtan elektr energııasy jappaı óshkenin jazǵan edik.
