Atyraýdaǵy azapqa toly 300 shaqyrym: Azǵyr halqy jol máselesin tezirek sheshýdi suraıdy
ATYRAÝ. KAZINFORM – Qurmanǵazy aýdanyna qarasty Azǵyr óńiriniń turǵyndary jol qurylysynyń uzaqqa sozylǵanyna shaǵymdanyp otyr. Shalǵaıda ornalasqan eldi meken halqy úshin jol máselesi jyldar boıy ózekti kúıinde qalyp otyr.
Azǵyr óńiri oblys ortalyǵy Atyraý qalasynan shamamen 600 shaqyrym, al aýdan ortalyǵy Qurmanǵazy aýylynan 310 shaqyrym qashyqtyqta ornalasqan. Bul aýmaqta Azǵyr, Asan, Súıindik aýyldyq okrýgteri bar. Alaıda joldyń oıdym-oıdym bolýy turǵyndardyń turmysyn qıyndatyp, kólik qatynasyn kúrdelendirgen. Oblystyq mańyzy bar «7-razezd-Asan-Azǵyr-Balqudyq-Súıindik» jolynyń jalpy uzyndyǵy 282 shaqyrymdy quraıdy.
Aýyl turǵyny Baqtygereı Seıithanovtyń aıtýynsha, jol qurylysy birneshe ret ýáde etilgenimen, naqty nátıje joq.
- Oblys ákimi de kelip, jol qurylysyn bastaımyz degen. Biraq áli kúnge deıin bastalǵan joq. Kólikter tikeleı qatynaı almaı, Besterek arqyly aınalyp júr. Eń bolmasa Asan aýylyna deıin jol salynsa eken. Jazda da, qysta da júrý qıyn, – dep pikir bildirdi aýyl turǵyny.
Joldyń sapasy tek qatynasqa emes, turǵyndardyń áleýmettik jaǵdaıyna áser etedi. Aýdan ortalyǵyna jetý qymbatqa túsedi, jedel járdem kólikteri jol boıynda jıi turyp qalady. Sonyń saldarynan naýqastardy ýaqytyly aýrýhanaǵa jetkizý qıyndaǵan. Sonymen qatar tasymaldyń qıyndyǵy azyq-túlik baǵasynyń ósýine ákelgen. Jergilikti halyq keıbir ónimderdi Reseıden aldyrtýǵa májbúr.
Atyraý oblysy jolaýshylar kóligi jáne avtomobıl joldary basqarmasynyń basshysy Áset Orazǵalıev jol jóndeý jumystary kezeń-kezeńimen júrgizilip jatqanyn aıtty. Onyń sózinshe, ótken jyly 0–36 shaqyrym aralyǵynda ortasha jóndeý bastalǵan.
- Osy jyly jumys qarqyn alady. Sonymen qatar 36–98 jáne 98–180 shaqyrym aralyqtaryna jobalyq-smetalyq qujattar daıyndalyp jatyr, – dedi basqarma basshysy.
Onyń aıtýynsha, jol qurylysy aımaqtyń geografııalyq erekshelikterine baılanysty kúrdeli. Bul baǵytta Qazaq jol ǵylymı-zertteý ınstıtýty mamandary zertteý júrgizip, topyraq pen sý quramyn saralaǵan. Zertteý nátıjesinde jobany jetildirýge qatysty usynystar berilgen.
- Joldyń keı ýchaskelerinde qum bar ekeni belgili. Jańa tehnologııaǵa sáıkes stabılızatordy qoldaný arqyly jol salý jumysyn jalǵastyratyn bolamyz,- dedi Áset Orazǵalıev.
Jaýapty mekeme ókilderi bıyl jyl sońyna deıin alǵashqy 36 shaqyrymdy aıaqtaýdy josparlap otyr. Sonymen qatar joldy kútip-ustaý boıynsha da turaqty jumystar júrgizilip jatqanyn málimdedi.
Buǵan deıin Shymkentte segiz jyl buryn bastalǵan A-2 avtomobıl jolynyń qurylysy qashan aıaqtalatyny jóninde jazǵan edik.
