Atyraýdaǵy avtobýstarda taǵy bir tólem júıesi iske qosyldy
ATYRAÝ. KAZINFORM — Atyraý qalasynyń turǵyndary endi qoǵamdyq kólikte eki tólem júıesi arqyly jol aqysyn tóleı alady. Mundaı ózgeris Onay qosymshasynyń óńir naryǵyna kirýmen baılanysty.
2018 jyldan beri elektrondy tólem júıesin engizip, jumys istep kele jatqan SmartQala kompanııasy qyzmetin toqtatqan joq. Olar qaladaǵy jolaýshylar tasymalyna jaýapty 7 mekememen de jumys isteıdi. Qaladaǵy barlyq avtobýsta Avtobys termınaly men QR kodtar bar.
— Barlyq qyzmet túri burynǵydaı qoljetimdi bolyp qala beredi. Ákimdikpen kelisimshart 2032 jylǵa deıin jasalǵan, avtobýstarda eki júıe qatar jumys isteı alady. Smart Qala kartalary arqyly jeńildikter tolyq saqtalady, kartany Jenil Avtobys saıty arqyly onlaın rásimdeýge bolady. Avtobys júıesi Qazaqstannyń 27 qalasynda jáne Qyrǵyzstanda jumys isteıdi. Al bul joba alǵash ret Atyraý qalasynda iske qosylǵan. Qazirgi tańda jolaqyny QR-kod nemese Bluetooth arqyly da ońaı tóleýge múmkindik bar, — dedi SmartQala kompanııasy dırektorynyń orynbasary Lázzat Dosmaǵambetova.
Kúni keshe avtobýstardaǵy SmartQala qondyrǵylarynyń janyna ONAY júıesi ornatyldy. Anyǵyn aıtqanda, qalaishilik jolaýshylar tasymalyna jaýapty 7 parktyń beseýine qarasty avtobýstarǵa 2 termınal qoıyldy. Qosymsha QR kodtar bar. Sondaı-aq júrgizýshiniń kómekshisi retinde arnaıy planshet jumys isteıdi.
— Qazirge deıin oqýshylarǵa 20 myńnan astam karta taratyldy, taǵy 20 myńǵa jýyq ótinim óńdelip jatyr. Kartalar basyp shyǵarylyp jatyr. Jeńildik sanatyndaǵy azamattar HQKO-da jáne jańadan ashylǵan ortalyqta 10 mınýt ishinde kartalaryn rásimdeı alady. Oqýshylar men jeńildik sanatyndaǵy azamattarǵa alǵashqy karta tegin beriledi. Al standartty kartanyń quny — 800 teńge, — dedi «Almaty qalasynyń Kólik holdıngi» JShS óńirlerdi damytý dırektory Dáýren Sábıtov.
Atyraý qalalyq jolaýshylar tasymaly men avtomobıl joldary bólimi qoǵamdyq kólikterdiń jumysy men ondaǵy tólem júıesin baqylaıdy.
— Jolaýshylar ózderine tıimdi tólem júıesin tańdaıdy. Jańa júıeniń tıimdiligin kóretin bolarmyz. Eń bastysy — qala turǵyndaryna yńǵaıly bolýy kerek, — dedi Atyraý qalasy ákiminiń orynbasary Tilek Mahýov.
Aıta keteıik, búginde Atyraý qalasynda 300 avtobýs 40-qa jýyq baǵytta jolaýshylardy tasymaldaıdy.
2 aı buryn jańa júıeniń jumysy bastalatyny jóninde jazǵan edik.