Atyraýdaǵy aýrýhanada qyzylshadan em alyp jatqandardyń basym bóligi ekpe saldyrmaǵan
ATYRAÝ.KAZINFORM - Qazirgi tańda oblystyq ınfektsııalyq aýrýhanada 290 naýqas em qabyldap jatyr, olardyń 137-siniń qyzylsha aýrýyn juqtyrǵany zerthanalyq taldaý nátıjesinde rastalǵan.
Dárigerlerdiń aıtýynsha, naýqastardyń 86%-y — josparly vaktsınatsııadan ótpegen balalar.
Mamandardyń sózinshe, ınfektsııanyń taralýyna birneshe faktor áser etedi, sonyń biri — qoǵamdyq ımmýnıtettiń tómendeýi jáne ekpe salynbaǵan balalardyń bolýy. Eger ýaqtyly vaktsınatsııa jasalsa, qyzylsha ınfektsııasy baqylaýda ustaýǵa bolatyn aýrý bolyp sanalady.
Qyzylshanyń bastapqy belgileri tumaýǵa uqsas bolýy múmkin, bul ýaqytynda dıagnoz qoıýdy qıyndatady. Naqty dıagnoz denede bórtpe paıda bolǵannan keıin jáne zerthanalyq taldaýlardan soń qoıylady.
– Qyzylshadan qorǵanýdyń eń tıimdi tásili – vaktsınatsııa. Biz ata-analardy balalarǵa ýaqytynda ekpe saldyrýǵa shaqyramyz. Mundaıda ata-analar óz balasyn ǵana emes, aınalasyndaǵylardy da qorǵaıdy. Qyzylshaǵa qarsy salynatyn vaktsına birden 3 aýrýdan — qyzylsha, epıdemııalyq parotıt jáne qyzamyqtan saqtandyrady. Keıbireýler ekpe saldarynan tserebraldy sal aýrýy nemese epılepsııa paıda bolýy múmkin dep qaýiptenedi, biraq bulardyń vaktsınatsııaǵa esh qatysy joq,- deıdi ınfektsıonıst dáriger Nurfııa Qızatova.
Dárigerlerdiń aıtýynsha, qoldanystaǵy qurama vaktsına Qazaqstanda on jyldan astam ýaqyt boıy salynyp keledi jáne óziniń qaýipsizdigi men tıimdiligin dáleldegen. Egý jumystary balalarǵa 6 aıdan bastap jáne 6 jasqa deıin Ulttyq ekpe kúntizbesine sáıkes júrgiziledi.
Qyzylshaǵa qarsy ekpe turǵyndardyń tirkelgen jeri boıynsha emhanalarda tegin júrgiziledi. Sonymen qatar, óńir turǵyndary qalaýy boıynsha jekemenshik medıtsınalyq ortalyqtarda aqyly negizde de vaktsına ala alady.
Aıta keteıik, vaktsınatsııa kezinde aıtarlyqtaı asqynýlar tirkelmegen.
Oblystyq densaýlyq saqtaý basqarmasy ata-analardyń vaktsınadan bas tartýynyń bir sebebi – aqparattandyrýdyń jetkiliksizdigi ekenin aıtady.
– Turǵyndar ekpeniń qanshalyqty paıdaly ekeninen tolyq habarsyz, sonyń kesirinen bas tartýshylar da kóp. Óńirde ekpeniń qaýipsizdigi men tıimdiligin túsindirý jumystary júrgizilip jatyr, – deıdi Atyraý oblystyq densaýlyq saqtaý basqarmasy basshysynyń orynbasary Murat Qurbanov.
Densaýlyq saqtaý basqarmasy óńirdegi epıdemıologııalyq jaǵdaı tolyq baqylaýda dep otyr. Oblys boıynsha 671 balaǵa vaktsına egilgen. Sarapshylar ýaqytynda josparly ımmýnızatsııadan ótýdi usynady, óıtkeni joǵary deńgeıdegi qoǵamdyq ımmýnıtet ınfektsııanyń taralýyna jol bermeıdi.
Osyǵan deıin Oralda qyzylshamen aýyrǵan balalardyń barlyǵy ekpe almaǵanyn jazǵan edik.
Osyǵan deıin mınıstrlik qyzylshamen aýrýshańdyqtyń eń joǵary kórsetkishteri Astana men Almaty qalalarynda, sondaı-aq Jambyl jáne Atyraý oblystarynda baıqalatynyn málimdedi. Atalǵan jaǵdaılardyń basym bóligi 5 jasqa deıingi balalar arasynda tirkelgen.