Atyraýdaǵy aýylda termıt zaqymdaǵan úılerdiń endigi jaǵdaıy qalaı bolmaq
ATYRAÝ. KAZINFORM – Jylyoı aýdanyna qarasty Maıkómgen aýylynda termıttiń taralýy turǵyndardyń alańdaýshylyǵyn týǵyzǵan. Jándik anyqtalǵan 21 turǵyn úı men bir áleýmettik nysanda zalalsyzdandyrý jumysy júrgizildi. Qazir jaǵdaı turaqty, merdiger aldaǵy alty aı boıy óńdelgen aýmaqty baqylaýda ustaıdy.
Aýyldyq okrýg ákimdiginiń málimetinshe, Maıkómgenniń dalalyq aýmaqtarynda termıt burynnan bar. Alaıda keıingi jyldary jándik eldimeken ishinen de anyqtala bastaǵan. Bul másele 2024 jyldyń sońynda kóterilip, 2025 jyly zalalsyzdandyrý jumysyn júrgizýge qoldaý kórsetetin merdiger izdestirilgen. Alaıda budan nátıje bolmaǵandyqtan bıyl osy maqsatqa bıýdjetten qarajat bólindi.
Anyqtaý jumysy barysynda aýyldaǵy 21 turǵyn úı men bir áleýmettik nysanda termıt bary belgili bolǵan. Qyrkúıek aıynda atalǵan nysandardaǵy taralý oshaqtaryna tıisti óńdeý jumysy júrgizildi. Zalalsyzdandyrý jumysyn júrgizý úshin «Dúısenov» jeke kásipkerligimen 3,8 mln teńgege kelisimshart jasalǵan. Onyń 3 mln teńgesi dári-dármekke, 800 myń teńgesi qyzmet kórsetýge qarastyrylǵan.
- Qazirgi ýaqytta termıtten qatty zaqymdanǵan turǵyn úı nemese áleýmettik nysan joq. Turǵyndar óz kúshterimen úılerin kútip ustap, jándiktiń taralý oshaqtaryn joıyp otyr,-dep habarlady Maıkómgen aýyldyq okýriginiń ákimdigi.
Sonymen qatar termıtterdiń taralý sebepterin anyqtaý jáne onymen kúresý joldaryn zerdeleý maqsatynda ǵylymı-zertteý ınstıtýttaryna hat joldanǵan.
- Termıt ushyp, kóshý arqyly kóbeıetin jándik. Taralý sebebin naqty bilmeımiz. Aldyn alý sharalary júrgizilgen joq. Sebebi, bul – aýqymdy jumys. Oǵan aýyldyq okrýgtiń deńgeıi jetpeıdi. Termıt máselesi alǵash kóterilip bastaǵan kezde respýblıkadaǵy ǵylymı-zertteý ınstıtýttaryna hat joldandy. Biraq Qazaqstanda da, Reseıde de birde bir ınstıtýt joq bolyp shyqty. Termıtpen kúres júrgizetin ınstıtýt Ózbekstan Respýblıkasynda ekendigin anyqtap, sol mekemege hat jazdyq. Máseleni sheshýge jumystandyq,-dep tolyqtyrdy okrýg ákimdigi.
Aıta keteıik, kelisimshartqa sáıkes, merdiger alty aıǵa deıin zalalsyzdandyrý jumysyn júrgizip, óńdelgen aýmaqtardy baqylaýda ustaıdy.
Maıkómgen aýyldyq okrýgi – Atyraý oblysy Jylyoı aýdanynyń aýmaǵynda ornalasqan. Ońtústiginde Mańǵystaý oblysymen, soltústiginde Qosshaǵyl aýyldyq okrýgimen shektesedi. Búginde 1100-den astam azamat turady.
Buǵan deıin Atyraý oblysyna qarasty Maqat aýdanynda iri qaranyń qyrylýyna qarasan aýrýy sebep bolǵanyn jazǵan edik.
