Atyraýdaǵy aýyl mańynda qasqyr júr

ATYRAÝ. KAZINFORM — Atyraý qalasynan 20 shaqyrymnan astam qashyqtaǵy Damby aýylynyń mańynda qasqyr júr. Jyrtqyshtyń eldi mekenge jaqyndaǵany turǵyndardy alańdatyp otyr. Bul aýyl Kaspıı teńiziniń jaǵalaýynan 40 shaqyrym qashyqtyqta ornalasqan. Aýyl turǵyndarynyń biri jol boıynan qasqyrdy kórip, vıdeoǵa túsirip alǵan.

Jeli qoldanýshysy «Bórisyrǵaqta burshaq borap, syrǵaq bolady deıtin edi. Jańbyr quıyp tur. Bóri aýylda júr, syrǵaq joq...», -dep jazba qaldyrdy.

Vıdeoda avtorynyń pikirinshe, turǵyndarǵa úreı týdyrǵan qasqyr atylǵan. 

Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Mereke Shalqarovtyń aıtýynsha, qazir qasqyrdyń uıyǵý kezeńi bastalǵan. 

«Kaspıı teńiziniń jaǵalaýynda qasqyr kóp. Túz taǵysynyń deni jaǵalaýdaǵy qamystyń arasyna tyǵylyp jatady. Bıylǵy jyly qys jyly bolǵandyqtan, jaǵalaý mańy batpaq, oǵan tehnıka bara almaıdy. Sondyqtan, turǵyndardan saq bolýdy suraımyz», -deıdi Mereke Shalqarov. 

Onyń aıtýynsha, bıyl óńirdegi ańshylarǵa 2 myń qasqyr atýǵa ruqsat berilgen. Ańshylyq bıleti, ruqsat qujaty bar ańshylar jyrtqyshty atyp alýyna bolady. 

Eske sala ketelik, buǵan deıin Atyraý oblysynan tabylǵan kıik óleksesine baılanysty tergeý júrip jatqanyn habarlaǵan edik.