Atyraýdaǵy aýdanda iri qaranyń qyrylýyna qarasan aýrýy sebep bolǵan
ATYRAÝ.KAZINFORM - Maqat aýdanyna qarasty «Bileýli ata» ýchaskesinde 10-ǵa jýyq iri qaranyń neden ólgeni belgili boldy. Atyraý oblystyq jer qatynastary jáne aýyl sharýashylyǵy basqarmasy zerthanalyq jumystyń nátıjesinde maldyń qyrylýyna emfızematozdy karbýnkýl aýrýy sebep bolǵanyn málimdedi.
Qazan aıynyń sońynda áleýmettik jelide Maqat aýdanynda iri qara maldyń aýyryp, ózdiginen júre almaı qalǵany jáne mal shyǵyny tirkelgeni túsirilgen vıdeo tarady.
Maldyń naqty neden qyrylǵanyn anyqtaý úshin synamalar alynyp, zerthanaǵa jiberilgen. Oblystyq jer qatynastary jáne aýyl sharýashylyǵy basqarmasynyń málimetinshe, emfızematozdy karbýnkýl aýrýynan ólgen mal sany toǵyzǵa jetken. Búginde aýyryp turǵan iri qara tirkelmegen.
- Zerthana nátıjesi boıynsha qarasan aýrýyna oń nátıje anyqtaldy. Aýdandaǵy epızootııalyq ahýal turaqty, jaǵdaı baqylaýda. Sonymen qatar aýdan boıynsha janýarlardyń asa qaýipti 8 túrli aýrýyna qarsy josparly vaktsınatsııa jumysy júrgizilip jatyr,-dep habarlady basqarmanyń baspasóz qyzmeti.
Emfızematozdy karbýnkýl nemese qarasan – iri qara malda kezdesetin, jiti ótetin juqpaly bakterııalyq aýrý. Ony Clostridium chauvoei bakterııasy qozdyrady. Aýrý kóbine bulshyqetterdiń isinýimen, dene qyzýynyń kóterilýimen jáne maldyń tez álsireýimen sıpattalady. Em ýaqytynda kórsetilmese, maldyń ólimine ákelýi múmkin.
Eske salaıyq, Qazaqstanda iri qara men usaq maldyń analyq basyn shetelge shyǵarýǵa alty aıǵa tyıym salyndy. Aýyl sharýashylyǵy jáne qarjy mınıstrleri tıisti birlesken buıryqqa qol qoıdy.
