Atyraýdaǵy áskerı mektepte eki otbasynyń egiz uldary oqyp júr
ATYRAÝ. KAZINFORM – Atyraýdaǵy «Sarmat» mamandandyrylǵan áskerı mektep-lıtseı-ınternatynda eki otbasynyń egiz uldary oqyp júr.
Atyraý oblystyq bilim basqarmasy baspasóz qyzmetiniń aqparatyna súıensek, byltyrǵy qyrkúıekte ashylǵan «Sarmat» mamandandyrylǵan mektep-lıtseı-ınternatynda 130 oqýshy bilim alyp júr.
«Bul – elimizdiń batys aımaǵynda ashylǵan alǵashqy áskerı baǵyttaǵy mektep. Munda tek uldar oqıdy. Bilim ordasynda jaratylystaný, matematıka baǵytyndaǵy pánder tereńdetip oqytylady. Qazir áskerı mektepte tek Atyraý oblysynyń ǵana emes, Mańǵystaý, Batys Qazaqstan, Shyǵys Qazaqstan, Jambyl oblystarynyń balalary oqyp júr. Oqýshylar jatahanamen, arnaıy kıimmen, tegin tamaqpen qamtylǵan», - dep habarlady basqarmanyń baspasóz qyzmeti.
Oqýshylardyń arasynda eki otbasynyń egiz uly bar. Sonyń biri – Azamat pen Azat Borıster. Olardyń ákesi Tájik-Aýǵan shekarasyndaǵy urys qımylyna qatysqan.
«Biz bolashaǵymyzdy áskerı salamen baılanystyrýdy kózdedik. Sol maqsatymyzǵa jetý úshin «Sarmat» mektebinde oqyp júrmiz. Men bolashaqta elimizdiń shekarasyn qorǵaıtyn sardar bolǵym keledi. Syńarym – Azat qutqarýshy mamandyǵyn qalap júr», - deıdi egizdiń syńary Azamat Borıs.
Ekinshi egiz – Naýryzbek pen Amangeldi Meırambek. Ekeýi de sportpen aınalysady. Olar sporttyń djıý-djıtsý túrinen chempıon atanǵan.
«Biz kishkentaı kezimizden áskerı qyzmetker bolýdy armandadyq. Atyraýda osy mektep ashylǵanda, qabyldaý emtıhanynan súrinbeı ótkenimizge qýandyq. Men polıtseı bolsam deımin. Al, Amangeldi órt sóndirýshi bolǵysy keledi», - deıdi Naýryzbek Amangeldi.
Eske sala ketelik, Mańǵystaýda áskerı boryshyn ótep júrgen atyraýlyq sarbaz aýylyna bóget salýǵa kelgenin jazǵan bolatynbyz.
