Atyraýdaǵy aralda ornalasqan aýylǵa avtomobıl kópiri salynbaıtyn boldy
ATYRAÝ. KAZINFORM — Atyraý oblysynda aralda ornalasqan Kóptoǵaı aýylyna kópir salynbaıtyn boldy. Osyǵan deıin Qurmanǵazy aýdanynyń ákimi Abat Janǵalıev Kóptoǵaı men Shortanbaı aýylyn baılanystyratyn kópirdiń jobasy jasaqtalyp jatqanyn aıtqan. Alaıda bıliktiń jospary ózgerip ketti.
Birneshe jyl boıy aýyl halqy ábden eskirgen 30 tonnalyq júzbeli kópir men ony súıreıtin kememen qatynap keldi. Jasalǵanyna 70 jyldan astam ýaqyt ótken sý kóligi tek ár jerin jamap-jasqaýmen ildáldalap júrgen edi. Keıin aýdannyń atqaminerleri máseleni sheshpek bolyp, 100 mıllıon teńgeden astam qarajatqa «BK-100» markili barkas satyp aldy. Ol ákelingen ýaqytta eksponat sekildi ózen jaǵasynda birneshe aı turdy. Aýyl halqynyń narazylyǵanan keıin jańa barkastyń tilin túsinetin maman shaqyrylyp, paıdalanýǵa berildi. Keıin taǵy da isten shyǵyp, qazir qoldanysta — sol baıaǵy eski keme. Búginde turǵyndar úshin kópir salý máselesi ózekti bolyr tur. Óıtkeni, keshki 20:00–den keıin keme jumysy toqtataıdy, ıaǵnı, qatynas úziledi.
Atyraý oblysy ákiminiń orynbasary Qaırat Nurtaev bir myńnan asa turǵyny bar eldi meken úshin kópir salý ekonomıkalyq jaǵynan tıimsiz dep otyr. Sondyqtan búginde jergilikti atqarýshy organ Dyńǵyzyl aýyly men Kóptoǵaı aýylyn baılanystyratyn ponton kópirin qoımaq.
— Kezinde jasalǵan jospar boıynsha kópir salý máselesi qarastyrylǵan. Buǵan úlken qarjy kerek. Balyq sharýashylyǵymen aınalysatyn «Amangeldi» JShS Shortanbaı aýylyndaǵy zaýytyn jańǵyrtyp jatyr. Al Kóptoǵaı aýylynan jer alyp, toǵanda balyq ósirmek, bir sózben aıtqanda balyq óńdeý kásibin damytpaq. Mamandarmen aqyldasa kelip, bıýdjetti tıimdi paıdalaný syndy máseleni nazarǵa ala otyryp, ponton kópirin salmaqpyz. Bul eń aldymen zaýytqa balyq tasymaldaıtyn kemelerdiń kirip-shyǵýyna eshqandaı kedergi keltirmeıdi. Qarjyny da únemdeımiz, — dedi Qaırat Nurtaev.
Ózen ústine ponton qoıylatyn bolsa, jobanyń qajettiligi bolmaıdy. Tek nysandy satyp alyp, paıdalanýǵa jáne balansqa berý máselesi qalady.
Qaırat Nurtaevtyń aıtýynsha, ponton kópiri arqyly aýyl halqynyń máselesin sheshý úshin qazynadan 4-5 mlrd teńge kerek dep josparlanyp otyr, al jańa kópir salý úshin 25 mlrd teńgedeı qarjy qajet. Ázirge ponton kópirin qashan ornatylatyny belgisiz. Bılik máseleni jan-jaqty qarap, arbany da syndyrmaıtyn, ógizdi de óltirmeıtin sheshimge toqtaımyz dep otyr.
Aıta keteıik, Kóptoǵaı aýyly Qazaqstan men Reseıdiń shekarasynda ornalasqan.
Osyǵan deıin Óskemende qıraǵan Shnaıder kópiri bir jylda qaıta salynatyny týraly jazdyq.