Atyraýdaǵy apat: búlingen temirjol qalpyna keltirilip, poıyz qozǵalysy jandandy

ATYRAÝ. KAZINFORM – Atyraý qalasynyń mańyndaǵy Teńdik stansasynda apattan búlingen temirjoldy qalpyna keltirý aıaqtaldy.

«Qazaqstan temir joly» UK» AQ baspasóz qyzmetiniń málimetinshe, saǵat 22:14-te jolaýshylar poıyzdarynyń qozǵalysy qaıta jandandy.

– Qalpyna keltirý jumysy kezinde relsten shyǵyp ketken lokomotıv pen vagondar ornyna qoıyldy. Al 200 metr zaqymdalǵan temirjol ýchaskesinde jer qazý jumystary júrgizilip, jańa rels-shpal qurylymy salyndy. Apattyń saldaryn joıýǵa 167 temirjolshy, 2 qalpyna keltirý poıyzy, 6 arnaıy tehnıka jumyldyryldy, -dep habarlady kompanııanyń baspasóz qyzmeti.

Aldyn ala málimetke sáıkes temirjoldaǵy apatqa júk kóligi júrgizýshisiniń temirjol ótkelinen ótý erejelerin buzýy sebep bolǵan. 

Osyǵan baılanysty jolaýshylar poıyzy kesteden keshikti. Sol sebepten poıyz jolaýshylary Maqat aýdanyndaǵy Qarabatan stansasynan Atyraý qalasyna deıin avtobýspen tasymaldandy. Jolaýshylarǵa ystyq tamaq usynylǵan.

Eske sala ketelik, budan buryn Atyraýdaǵy poıyz apatynan zardap shekken 3 mashınıst aýyr jaraqat alǵan edi. 

Temirjoldaǵy apattyń saldarynan keshikken jolaýshylar Atyraýǵa avtobýspen tasymaldanǵanyn habarlaǵan bolatynbyz. 

Sondaı-aq Atyraý mańyndaǵy apattyń saldarynan 6 jolaýshylar poıyzy keshigetinin jazǵan edik.