Atyraýdaǵy alty kópirdiń tehnıkalyq jaǵdaıy zertteledi
ATYRAÝ. KAZINFORM — Atyraýda Jaıyq ózeni arqyly ótetin alty avtokólik kópiriniń tehnıkalyq jaǵdaıy arnaıy zertteýden ótedi. Jumys barysynda kópir konstrýktsııalarynyń beriktigi, tirekteri men júk kóterý múmkindigi baǵalanyp, nysandardy ári qaraı paıdalaný tártibi anyqtalady.
Tehnıkalyq zertteýge Abaı kóshesindegi ortalyq, Turǵyndar qalashyǵy men Avangard yqshamaýdandaryn baılanystyratyn, Balyqshy men Jumysker yqshamaýdandaryn jalǵaıtyn kópir kiredi. Sondaı-aq Beıbarys Sultan dańǵylyndaǵy, Musa Baımuhanov kóshesi men Atyraý yqshamaýdanyn baılanystyratyn jáne Ǵabbas Berǵalıev kóshesindegi kópirler tekseriledi.
Atyraý qalalyq jolaýshylar kóligi jáne avtomobıl joldary bólimi tehnıkalyq zertteý júrgizýge ashyq konkýrs jarııalaǵan. Memlekettik satyp alý qorytyndysy boıynsha Aqtóbe qalasynyń kompanııasy 75 mln teńgege jeńimpaz atanǵan. Jumystyń bastapqy quny 122,4 mln teńge bolǵan. Ázirshe tapsyrys berýshi men merdiger arasynda kelisimshart jasala qoıǵan joq.
Bólimniń bas mamany Sálimjan Musabaevtyń aıtýynsha, merdiger anyqtalǵannan keıin memlekettik satyp alý talaptaryna sáıkes bes jumys kúni ishinde kelisimshart jasalady.
— Merdigerdiń qajetti tehnıkasy, mamandary jáne osy baǵyttaǵy jumys tájirıbesi tekseriledi. Bul jumysta tıisti tehnıka men mamandardyń bolýy mańyzdy. Onyń ishinde kópir tirekteriniń sý astyndaǵy bóligin tekseretin súńgýir mamandar da qarastyrylǵan, — deıdi Sálimjan Musabaev.
Tehnıkalyq zertteý kezinde kópirlerdiń syrtqy jaǵdaıy da qaralady. Mamandar konstrýktsııalardaǵy jaryqtar, deformatsııalar men basqa da aqaýlardy anyqtap, olardyń ornalasqan jeri men sıpatyn tirkeıdi. Sonymen qatar kópirdiń naqty ólshemderi, negizgi kótergish konstrýktsııalary men materıaldarynyń jaǵdaıy zertteledi. Budan bólek, kópir tirekteri men irgetastary, sonyń ishinde sý astyndaǵy bólikteri tekseriledi. Qajet bolǵan jaǵdaıda arnaıy mamandardyń kómegimen kópir tirekteriniń sý astyndaǵy konstrýktsııalary zertteledi.
Zertteý aıasynda kópirlerdiń júk kóterý qabileti de eseptelip, dınamıkalyq synaqtar júrgiziledi. Onyń nátıjesinde nysandardyń naqty tehnıkalyq jaǵdaıy baǵalanady. Zertteý jumysy jyl sońyna deıin júrgiziledi dep jospalanyp otyr. Kelisimge sáıkes bul joba aýyspaly bolyp ózgerip, keler jyly da jalǵasýy múmkin.
Zertteý aıaqtalǵannan keıin ár kópir boıynsha tehnıkalyq qorytyndy jasalady. Onda nysandy ári qaraı paıdalaný tártibi, jóndeý nemese qaıta jańartý qajettiligi kórsetiledi. Osy qorytyndyǵa sáıkes ákimdik kelesi jylǵa qajetti jumystardy josparlaıdy.
Eske salaıyq, Atyraýdaǵy ortalyq kópir maýsym aıynda 10 kúnge jabylyp, ortasha jóndeýden ótti.
Bul kópirdiń taǵdyry kópti alańdatady. Jyl basynda qala ákimi Shákir Keıkın 1965 jyly paıdalanýǵa berilgen kópirdiń qasyna jańa kópir salý jobasy qarastyrylyp jatqany jóninde aıtqan edi. Ázirge jańa joba tanystyrylǵan joq.
