Atyraýdaǵy «Aqjaıyq» tabıǵı rezervatynyń aýmaǵynda qamys janyp jatyr

ATYRAÝ. KAZINFORM – Atyraý oblysyndaǵy «Aqjaıyq» memlekettik tabıǵı rezervatynyń aýmaǵynda qamys órtenip jatyr. 

Atyraý óńirlik kommýnıkatsııaar qyzmetiniń málimetine qaraǵanda, qamys órtinen eldi mekenderge tónip turǵan qaýip joq.

— Órtengen aýmaqtyń sýly, batpaqty bolýy órtti sóndirýge qıyndyq týyndady. Qamys qalyń, ári bıik ósken. Órtti sóndirý jumystaryna Atyraý oblysynyń tótenshe jaǵdaılar departamentinen 84 órt sóndirýshi, 15 tehnıka, «Aqjaıyq» memlekettik tabıǵı rezervatynan 25 adam, 10 tehnıka tartyldy, -dep habarlady kommnýnıkatsııalar qyzmeti.

«Aq Jaıyq» memlekettik tabıǵı rezervatynyń 2 traktorymen 20 shaqyrym aýmaqta arnaıy jolaq salynǵan. Qamys órtin sóndirý jumysy jalǵasyp jatyr.

Eske sala ketelik, buǵan deıin qatty jeldiń saldarynan Kaspıı jaǵalaýyndaǵy qamys órtiniń aýmaǵy ulǵaıǵanyn jazǵan edik.

Keıin Kaspıı jaǵalaýynda 450 gektardy sharpyǵan qamys órti sóndirilgenin habarlaǵan bolatynbyz.