Atyraýdaǵy 4 mekteptiń ashanasynda qujaty joq etten as ázirlengen
ATYRAÝ. KAZINFORM — Atyraý qalasyndaǵy 4 mekteptiń ashanasynda oqýshylarǵa qujaty joq etten pisirilgen taǵamdar berilip kelgen. Bul derek sybaılas jemqorlyqqa qarsy volonterler jasaǵan monıtorıng kezinde anyqtaldy.
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, monıtorıng №3, 16, 33 jáne 35-mekteptiń ashanasyna júrgizilgen. Oǵan oblystyq sanıtarlyq-epıdemıologııalyq baqylaý salasyndaǵy sarapshylar tartylǵan.
«Aldymen turǵyndardyń áleýmettik jelide jarııalanǵan shaǵymdary zertteldi. Sodan soń mektep ashanalarynda tegin tamaqtanýdy qamtamasyz etý jáne uıymdastyrýǵa baılanysty №3, 16, 33 jáne 35 mekteptiń ashanasyna monıtorıng júrgizildi. Monıtorıng qorytyndysymen birneshe jaıt anyqtaldy. Atap aıtqanda, et ónimderiniń qaýipsizdigin rastaıtyn, onyń ishinde tehnıkalyq reglamentterde kózdelgen sáıkestikti baǵalaý (rastaý) týraly qujattar bolmaı shyqty. Normatıvtik-quqyqtyq aktilerdiń talaptaryna sáıkes kelmeıtin azyq-túlik ónimderiniń qaýipsizdik qujattary óndirýshiniń qolymen jáne mórimen rastalmaǵan. Ashanalarda jeldetý júıesin tazartýǵa jáne dezınfektsııalaýǵa shart jasalmaǵan. Tamaq pisirýge emali zaqymdalǵan las ydystardy qoldanýǵa ruqsat etilgen. Shıki jáne daıyn et bir tońazytqyshta saqtalǵan. Tamaq pisirý protsesin óndiristik baqylaý baǵdarlamasy ázirlenbegen», - dep habarlady departamenttiń baspasóz qyzmeti.
Atalǵan mektepterdiń ashanasynda Densaýlyq saqtaý mınıstriniń 2022 jylǵy 17 aqpandaǵy №16 buıryǵymen bekitilgen «Tamaqtaný obektilerine qoıylatyn sanıtarııalyq-epıdemıologııalyq talaptar týraly», «Eýrazııalyq ekonomıkalyq odaqtyń tehnıkalyq reglamentteriniń talaptaryna sáıkestik sertıfıkaty men sáıkestik týraly deklaratsııanyń biryńǵaı nysandary jáne olardy resimdeý qaǵıdalary týraly» qaǵıdalary, Densaýlyq saqtaý mınıstriniń 2021 jylǵy 1 qyrkúıektegi №95 buıryǵymen bekitilgen «Jeldetý jáne aýany baptaý júıelerin dezınfektsııalaýǵa qoıylatyn sanıtarııalyq-epıdemıologııalyq talaptar týraly» qaǵıdalary buzylǵan.
«Ashana qyzmetkerleri taǵamdardy usyný jáne nan ónimderin satý kezinde grammdardy saqtamaıdy. Mysaly, mázirdiń kalkýlıatsııasyna sáıkes 60 gramm kómesh beriledi. Biraq qyzmetkerler ony kózben ólshep bólip, taratady. Ónimdi ólsheý kezinde kómeshtiń salmaǵy 48-den 62 grammǵa deıin ózgeretini anyqtaldy. Nan ónimderin taratqanda da dál osyndaı jaǵdaı baıqaldy. Kondıterlik jáne nan ónimderiniń baǵasy oblystyń barlyq mektebinde birdeı, biraq salmaǵy ártúrli. Máselen, №33 mektepte 130 gramm pıtstsa 250 teńge turady. Al, №35 mektepte bul somaǵa tek 100 gramm pıtstsa satyp alýǵa bolady», -dep málim etti baspasóz qyzmeti.
Monıtorıng nátıjesimen tıisti organdarǵa anyqtalǵan buzýshylyqtardy joıý boıynsha usynystar joldandy.
Eske sala ketelik, buǵan deıin Atyraýda 13 jastaǵy jasóspirimge qatarlasy álimjettik jasap, polıtsııa tergeýdi bastaǵanyn jazǵan edik.
