Atyraýdaǵy 26 zırattyń aýmaǵy endi keńeıtilmeıdi
ATYRAÝ. KAZINFORM — Atyraý qalasy men aýyldyq okrýgter aýmaǵyndaǵy 26 zırattyń jer kólemi budan bylaı ulǵaıtylmaıdy. Bul sheshim oblys ortalyǵynyń bas josparyna engiziletin ózgerister aıasynda qabyldanbaq.
Zırattardyń 14-i qala aýmaǵynda bolsa, 12-si aýyldyq okrýgterde ornalasqan. Bul ózgeris Atyraý qalasynyń bas josparyna engizilip jatqan túzetýlerge baılanysty qolǵa alynbaq. Qalalyq ákimdik ókilderiniń aıtýynsha, zırattardyń «jabylýy» ol jerlerde jerleýge tolyq tyıym salynady degendi bildirmeıdi. Qoldanystaǵy qorymda oryn bolsa, jerleý rásimin ótkizýge ruqsat etiledi, ıaǵnı turǵyndar burynǵydaı jaqyndaryn osy zırattarǵa jerleı alady.
Negizgi ózgeris — qorymdardyń aýmaǵy ári qaraı ulǵaıtylmaýy. Sonymen qatar sanıtarııalyq qorǵaý aımaǵyn 300 metrden 100 metrge deıin qysqartý josparlanyp otyr. Atyraý qalalyq TÚKSh jáne turǵyn úı bóliminiń sektor meńgerýshisi Máýlen Salamatovtyń aıtýynsha, bas jospar bekitilgennen keıin 26 zırattyń syrtynda abattandyrý jumystary júrgiziledi.
— Sheshim shyqqannan keıin atalǵan zırattardyń aınalasyna saıabaq salý, kógaldandyrý jumysy júrgiziledi. Ol jerlerge turǵyn úı keshenderi men oıyn alańdary salynbaıdy, — dedi Máýlen Salamatov.
Onyń sózinshe, Afanasev kóshesindegi eki-úsh adam ǵana jerlengen shaǵyn qorym, Ashhabadskıı kóshesindegi osyndaı zırat jáne memlekettik aktisi joq birqatar qorym boıynsha da tıisti jumystar júrgiziledi. Olardyń aýmaǵy qorshalyp, sanıtarııalyq qorǵaý aımaǵy qysqartylady.
Buǵan deıin Órken, Jańatalap jáne Keńózek eldi mekenderindegi zırattardyń aýmaǵy keńeıtilgen. Qazirgi tańda bul qorymdarda jerleýge arnalǵan oryndar bar.
Al qala bıligi bolashaqta jańa zırat ashý úshin Aqjar-2 yqshamaýdanynyń batysynan jer qarastyryp jatyr. Bas jospar bekitilgenge deıin jańa qorymnyń naqty aýmaǵy anyqtalyp, qajetti memlekettik aktiler rásimdelmek.
Atyraý qalasynyń jańa bas josparynda sý basý qaýpi bar aýmaqtarda, sanıtarlyq-qorǵanysh aımaqtarynda jáne ınjenerlik jelilerdiń qorǵaý beldeýlerinde ornalasqan nysandardy kezeń-kezeńimen memleket muqtajyna alyp, buzý qarastyrylǵan.
Sondaı-aq jergilikti bılik Atyraý qalasyn eki ákimshilik aýdanǵa bólý máselesin qarastyryp jatyr.
