Atyraýdaǵy 23 yqsham aýdanda káriz jelisi joq

ATYRAÝ. KAZINFORM — Atyraý qalasyndaǵy 23 yqsham aýdan ortalyq káriz jelisine qosylmaǵan. Sonyń saldarynan «Mıras», «Juldyz-2», «Saryqamys», «Jumysker», «Órken», «Kóktem» sekildi birneshe yqsham aýdan turǵyndary ondaǵan jyl boıy jerasty sýynyń zardabyn shegip otyr.

ıAǵnı jańbyr men qar jaýǵannan keıin jerasty sýy kóterilip, jer betine shyǵyp, halyqty ábigerge salady. Saldarynan jer úılerdiń irgetasy otyryp, qabyrǵalarda jaryq paıda bolǵan. Osylaısha, turǵyn úılerge qaýip tónip otyr.

Bul másele áli kúnge ózektiligin joǵaltqan emes. Tek bıyl ǵana «Geolog», «Juldyz-1», «Juldyz-2» jáne «Mıras» yqsham aýdandaryn káriz jelisimen qamtý maqsatynda 90 shaqyrymnan astam jerge qubyr tartý bastalǵan edi.

Oblys ákimi Serik Shápkenovtiń aıtýynsha, «Mıras» yqsham aýdany boıynsha bastalǵan jumys keler jyly aıaqtalady.

«Kelesi jyldyń qańtar aıynda «Saryqamys» yqsham aýdany boıynsha jumys bastalady. Qarajat máselesi sheshilip tur. Qurylys jumysy kezeń-kezeńimen qolǵa alynady», dedi oblys ákimi Serik Shápkenov.

Budan bólek Atyraýda 30-dan astam káriz sorǵy stantsııasy modernızatsııaǵa suranyp tur. Aımaq basshysynyń sózinshe, olardy jańǵyrtý jumysynyń jobalary tolyq aıaqtaldy.

«Buǵan deıin «Nursaıa» yqsham aýdanyndaǵy káriz sorǵy stansasy jumys istemeı qalyp, 2 apta boıy kommýnaldyq sala mamandary sol aýmaqta jumys istegen edi. Birneshe sorǵy qoıdy, basqa da jumys isteldi. Osy jaǵdaıdan keıin káriz sorǵy stansalaryn modernızatsııalaý jumysy bastaldy. Búginde qalada 85 káriz sorǵy stansasy bar. Olarǵa tehnıkalyq tekseris júrgizilip, 45-in jóndeý týraly sheshim qabyldandy. Bıyl 9 stansanyń kúrdeli jóndeýin aıaqtadyq. Keler jyly basqalaryna tıisti qarajatyn taýyp beremiz», dedi S.Shápkenov.

Aıta keteıik, osy jyly Atyraý qalasynda jalpy uzyndyǵy 33 shaqyrym bolatyn káriz qubyry aýystyrylyp jatyr.

Biz osyǵan deıin Atyraýda joldyń opyrylýyna sebep bolǵan káriz qubyryn taba almaı jatqany týraly jazdyq.