Atyraýdaǵy 16 shaqyrymdyq kanaldyń taǵdyry: jańǵyrtýdyń shekti quny – 31,6 mlrd teńge
ATYRAÝ. KAZINFORM – Atyraýdaǵy Erik-Mostovoı kanalynyń máselesi birneshe jyldan beri sheshimin tappaı keledi. Qazir kanaldyń keı bóligin qalyń shóp basyp, ishinde sasyq sý jınalǵan. Qoqys ta kóp. Buǵan deıin nysandy qaıta jańǵyrtý josparlanǵan. Jańa jobanyń shekti quny 31 mlrd 669 mln teńge dep belgilengenimen, qurylystyń naqty qashan bastalatyny ázirge belgisiz.
Joba boıynsha uzyndyǵy 16 shaqyrym bolatyn ashyq kanal júıesin jabyq júıege aýystyrý kózdelgen. Sonymen qatar sý burý jáne káriz ınfraqurylymyn jańartý, aýmaqty abattandyrý josparlanyp otyr. Atap aıtqanda, kanal boıymen 16 shaqyrym velosıped jáne júgirý jolaǵyn salý, ózdiginen aǵatyn, qysymdy jáne nóserli káriz jelilerin júrgizý, káriz sorǵy stantsııasyn salý qarastyrylǵan. Budan bólek, jaryq ornatylyp, kógaldandyrý jáne tas tósenish tóseý jumysy júrgiziledi.
Biraq ázirge bul jumystyń bastalý merzimi belgisiz. Qalalyq ákimdiktiń málimetinshe, qazirgi ýaqytta konkýrs jarııalaýǵa qajetti qujattar rásimdelip jatyr. Al jobalaý jumysyn osy jyldyń sońyna deıin aıaqtaý josparlanǵan.
- Jobalaý jumysyn bastap, ony osy jyldyń sońyna deıin aıaqtaý josparlanyp otyr. 2027 jyly jobany memlekettik saraptamaǵa engizý kózdelgen. Memlekettik saraptamanyń oń qorytyndysy alynǵannan keıin ǵana jobanyń naqty quny aıqyndalatynyn habarlaımyz, – dep málimdedi Atyraý qalasynyń ákimdigi.
Naqtylap aıtqanda, qazir aıtylyp otyrǵan 31 mlrd 669 mln teńge jobanyń túpkilikti quny emes, shekti quny bolyp otyr. Búginde bul jumys úshin ázirge qazynadan qarjy bólinbegen.
Erik-Mostovoı kanalyn jańǵyrtý týraly sóz buǵan deıin de bolǵan.2023 jyly Atyraý qalasynyń qalalyq qurylys bólimi «Redline Pro» JShS-men kanalyn qaıta jańǵyrtý jobasyna jobalaý-smetalyq qujattama ázirleý boıynsha kelisimshart jasaǵan. Alaıda jobalaýshy uıym jumys josparyna sáıkes mindetterin oryndamaǵandyqtan, kelisimshart buzylǵan.
Eske salaıyq, Atyraýda birneshe mekemeniń qaraýynda bolǵan retro-saıabaqty jóndeýge 564 mln teńge qajet.
