Atyraýda zorlyqqa ushyraǵan qyz kómek surady

ATYRAÝ. KAZINFORM – Atyraýda 15 jasynda eriksiz turmysqa shyqqan qyz kúıeýinen zábir kórgenin aıtyp, kómek surady. 

Ózin Móldir Amandyq dep tanystyrǵan qyzdyń vıdeosy «Prezıdentke hat» telegram arnasynda júkteldi. Onyń sózinshe, oǵan kúıeýi qysym kórsetip, qorqytyp,  erkinen tys málimdeme jasatyp, telefonyn syndyryp tastaǵan. 

«Men ınstagramdaǵy jazbany ketirý úshin úndeý jasaǵan bolatynmyn. Alaıda, mán-jaıdyń astaryn eshkim bilmeıdi. Mine, búgin bar kúsh-jigerimdi jınap, sizderge qaıtadan úndeý jasap otyrmyn. Ne úshin? Sebebi, sol jazba salynǵannan keıin kúıeýimniń ákesi, organda jasaıtyn qaıyn aǵam kelip, alyp ketti. Olar maǵan bárin ózderiniń aıtýymen ǵana istetti. Óz erkimmen eshteńeni jasaǵan joqpyn. Komıssııa kelip teksergende de, komıssııa kelmes buryn da maǵan «osylaı sóıle» dep buıyrdy. Qorqytyp, meni májbúrledi. Álgi sózdi óz erkimmen aıtpadym. Aldap, tastap ketti. Endi mende basqa amal joq. Anam qaterli isikpen aýyrǵasyn, júrýge shamasy joq, kúnnen kúnge álsirep barady. Komıssııa sheshimin alyp, prokýratýradan osy isti qaıta qaraýdy suraıyn desek, oǵan maǵan demeý bolatyn ákem de, anam da sharasyz bolyp otyr», - deıdi Móldir Amandyq. 

Buǵan deıin Atyraýda qyrkúıekte 15 jastaǵy qyzdyń eriksiz turmysqa shyqqany týraly jazǵan edik. Sol kezde áleýmettik jelide taraǵan aqparatqa baılanysty oblystyq polıtsııa departamenti tergeý qaıta jandanatynyn habarlaǵan. 

Atyraý oblystyq polıtsııa departamenti baspasóz qyzmetiniń aqparatyna qaraǵanda, qazirgi kezde atalǵan derekke qatysty qylmystyq is qozǵalǵan. 

«Alǵashqy tergeý barysynda qylmys quramyn tolyqqandy tergeý úshin jábirlenýshi tarap tıisti sot-medıtsınalyq, psıhıatrııalyq saraptamalarynan ótýden bas tartyp, keshendi tergeý áreketterin júrgizýde kedergiler keltirgen. Alaıda, 25 qyrkúıek kúni áleýmettik jelide taralǵan málimetter boıynsha tergeý jańǵyrtylǵan bolatyn. Qazirgi kezde tergeý jalǵasyp jatyr», - dep habarlady departamenttiń baspasóz qyzmeti.