Atyraýda beıitterdi qıratty dep kúdikke ilingen jasóspirimder ustaldy

ATYRAÝ. KAZINFORM — 2 jeltoqsan kúni Atyraý qalasyna qarasty Erkinqala aýyly mańyndaǵy musylman zıratynda vandalızm áreketi tirkelgen bolatyn. Osy qylmysqa qatysy bar degen kúdikpen úsh jasóspirim ustaldy. Bul týraly «Moı gorod» saıty jazdy.

Týysynyń zıratyna Quran baǵyshtaý úshin kelgen jergilikti turǵyn qabirdiń zaqymdalǵanyn baıqaǵan. Dál sol azamat polıtsııa shaqyrǵan. Belgisiz bireýler qulpytastardy syndyryp, qorshaýlardy qıratqan, al julynǵan metall aıshyqtardy jerge qaǵyp ketken. Oqıǵa Erkinqala aýylyna jaqyn jerde bolǵan.

Atyraý oblystyq polıtsııa departamentiniń baspasóz qyzmetiniń habarlaýynsha, oqıǵadan keıin sotqa deıingi tergeý bastalǵan.

Erkinqala aýylynyń mańyndaǵy qabirlerdi búldirý faktisi boıynsha polıtsııa dereý sotqa deıingi tergeý júrgizýdi bastaǵan. Kúdiktiler anyqtalyp, ustaldy. Nátıjesinde polıtsııa bólimine úsh kúdikti jetkizildi. Olardyń barlyǵy — kámeletke tolmaǵandar, sondyqtan olardyń jaýaptary zańdy ókilderiniń qatysýymen alynyp jatyr.

— Qazirgi ýaqytta zańda kózdelgen barlyq tergeý amaldary júrgizilip jatyr. Sonymen qatar kámeletke tolmaǵandar ishki ister organdarynyń esebine qoıylady, al is materıaldary kámeletke tolmaǵandar isi jónindegi komıssııaǵa jiberiledi. Tergeý barysynda quqyq buzýshylardyń ata-analaryn jaýapkershilikke tartý máselesi qaralady, — dep habarlady polıtsııa ókilderi.

Buǵan deıin osy qylmysqa qatysy bar tulǵalardy anyqtaýǵa baǵyttalǵan jedel-izdestirý sharalary júrgizilip jatqanyn habarlaǵan edik.