Atyraýda júzdegen mıllıonǵa salynǵan 3 polıtsııa beketi qańyrap bos tur
ATYRAÝ.KAZINFORM – Árqaısysy 300 mln teńgege salynǵan Atyraý qalasynyń shyǵa berisindegi 3 polıtsııa pýnkti áli kúnge qańyrap bos tur. Tipti keıbiriniń esigi ashyq jatyr, kez kelgen adam emin-erkin kirip shyǵady.
2018 jyly Atyraý – Oral, Atyraý – Inder, Atyraý – Aqtaý jáne Atyraý-Astrahan joldarynyń boıynda polıtseılerge shtattan tys jaǵdaılardyń týyndaǵanda jedel áreket etýge múmkindik beretin 4 beket salyndy. Qazirgi ýaqytta tek Atyraý-Astrahan tas jolynyń shekaradaǵy ótkizý beketine jaqyn salynǵan pýnkt paıdalanylyp otyr. Al qalǵan úsheýi bos tur. Karantın ýaqytynda bul nysandar blokbeket retinde jumys istedi.
2021 jyly qalalyq ákimdik «Atyraý-Dossor» jáne «Atyraý-Inder» trassasyndaǵy statsıonarlyq eki polıtsııa beketiniń ǵımaratyn aýktsıonǵa shyǵardy. Kásipkerge 9 jáne 10 mıllıon teńge kepildik jarnasyn tóleý kerektigi týraly mindet qoıylǵan edi. Degenmen qyzyǵýshylyq tanytqan bıznesmen bolmady.
Qazirgi ýaqytta 3 beket Atyraý qalalyq turǵyn úı kommýnaldyq sharýashylyq jáne turǵyn úı ınspektsııa bóliminiń balansynda. Endi bólim bul ǵımarattardy kúrdeli jóndeýden ótkizip, polıtsııa departamentine bermek.
- Qazirgi tańda bólim teńgerimindegi atalǵan pýnktterge kúrdeli jóndeý jumystaryn júrgizý úshin jobalaý-smetalyq qujattamany ázirleý jumystary qolǵa alynyp jatyr. Aldaǵy ýaqytta kúrdeli jóndeý jumystary aıaqtalǵannan keıin atalǵan nysandardy «Atyraý oblysy Polıtsııa departamenti» teńgerimine berý jumystary júrgiziletin bolady, - dep málimdedi qalalyq TÚKSh jáne turǵyn úı ınpektsııasy bólimi.
Jalpy beketter qazir adam shoshyrlyq jaǵdaıda tur. 2 qabatty nysannyń qabyrǵasyndaǵy sylaǵy túsip, tóbesindegi jabyndylar qulap jatyr. Terezeleri synyp, ıesiz nysanǵa aınalǵan. Jalpy ákimdikke ǵımaratty jóndeý týraly usynysty polıtsııa departamenti aıtqan.
- Beketterdiń basty maqsaty – qoǵamdyq qaýipsizdikti qamtamasyz etý, qylmystyń aldyn alý jáne jedel is-sharalardy júrgizý. Bul nysandar qyzmetkerlerdiń kóshpeli jumys orny dep aıtýǵa bolady. Bizde aýysymmen jumys isteıtin qyzmetkerler bar. Olardyń arasynda patrýldik polıtsııa qyzmetkerleri bar. Beketter atalǵan qyzmettiń jumys baǵytyna paıdalanylady, - dedi oblystyq PD baspasóz hatshysy Meıirim Erdáýlet.
Kúrdeli jóndeý jumystarynyń bastalatyn ýaqyty ázirge beımálim. Óıtkeni, jóndeý jumysynyń jobasy áli bastalmady. Polıtsııa qyzmetkerleri bolsa jol boıyndaǵy patrýldeý jumysyn kólikti otyryp jalǵastyra bermek.
Buǵan deıin Reseımen shekaradaǵy Qurmanǵazy beketinde kezek máselesi qalaı sheshiletinin jazǵan edik.
