Atyraýda jumyrtqa qansha turady

ATYRAÝ. KAZINFORM – Atyraý qalasynda áleýmettik mańyzy bar sanalatyn jumyrtqa baǵasy aıtarlyqtaı qymbattaǵan. Sýpermarketterde bir jumyrtqa 69-70 teńgeden satylsa, úı mańyndaǵy shaǵyn dúkenderde onyń quny 75-80 teńgege jetti.

Atyraýdaǵy ortalyq bazarda jumys isteıtin saýdagerlerdiń sózinshe, jumyrtqa baǵasy bir aıdyń ishinde kúrt ósken. Satýshy Anar Sandashovanyń aıtýynsha, kóterme jetkizýshiler jumyrtqany 72 teńgeden ákeledi. Dúkender ony 75 teńgeden satýǵa májbúr. Onyń sózinshe, kúnine nebári 5-6 qorap qana ónim satylady. Buǵan deıin naryqta bolǵan Reseıden keletin ımporttyq ónimniń azaıýy tapshylyqqa, sáıkesinshe baǵaǵa áser etip otyr.

– Qazir Reseıden jumyrtqa kelmeıdi. Sondyqtan negizinen Qazaqstanda óndirilgen ónimderdi satyp otyrmyz. Biraq onyń ózi jetkiliksiz. Byltyr baǵa 67 teńgege deıin kóterilgen edi. Jazda 40-qa deıin tómen tústi, – deıdi satýshy.

Resmı statıstıkaǵa súıensek, óńirde jumyrtqa baǵasy bir jyl ishinde 14,7 paıyzǵa ósken. Muny oblystyń statıst mamandary aıtyp otyr. Al qala ákimdigi baǵanyń ósýin maýsymdyq qubylyspen baılanystyrady. Mamandardyń túsindirýinshe, bul kezeńde qus fabrıkalarynda óndiris kólemi tómendeıdi.

– Jumyrtqanyń baǵasy jyl saıyn aqpan aıynda ósedi. Óıtkeni, qus fabrıkalarynda óndiris kólemi azaıady. Birinshi ózderi ornalasqan aýmaqty qamtıdy. Sodan keıin ǵana basqa óńirge saýda-sattyqqa shyǵarady. Qazirgi ýaqytta Atyraýda «Dáýlet qus» kompanııasy bar. Bul fabrıka suranystyń 40 paıyzyn jabady. Al qalǵan 60 paıyzy basqa óńirlerden ákelinedi. Ózimizden shyqqan jumyrtqanyń S0 sanaty 65, S1 62 teńgeden,-dedi Atyraý qalalyq kásipkerlik jáne aýyl sharýashylyǵy bólimi basshysynyń orynbasary Altynaı Sársenova.

Óńirge jumyrtqa Aqtóbe, Oral, Pavlodar, Kókshetaý jáne Qostanaı qalalarynan tasymaldanyp otyr. Jumyrtqa áleýmettik mańyzy bar azyq-túliktiń qatarynda bolǵandyqtan satýshylar ózderi satyp alǵan qunǵa 15 paıyz qosa alady. Jetkizýshiler aldymen ónimdi óńirlerden satyp alyp, óz ústemesin qosady. Odan keıin ǵana saýda oryndaryna jetkizedi. Buǵan tasymal shyǵyndary da áser etedi. Jyl saıyn osy kezeńde baǵa ósimi baıqalady.

Buǵan deıin elimizde kartop eksporty jalǵasady, jumyrtqa ımporty ýaqytsha toqtaıtynyn jazǵan edik.