Atyraýda Jumeken Nájimedenov týraly «Ult urany jáne Uly aqyn» atty kitaptyń tusaýkeseri ótti
ATYRAÝ. KAZINFORM - Atyraýda aqıyq aqyn, memleket jáne qoǵam qaıratkeri Jumeken Nájimedenovtiń 90 jyldyq mereıtoıyna oraı birqatar mádenı is-sharalar ótip jatyr.
Aptalyq aıasynda zııaly qaýym ókilderi aqyn eskertkishine gúl shoqtaryn qoıyp, H.Dosmuhamedov atyndaǵy Atyraý ýnıversıtetinde «Jumeken jyrlary – ǵasyr úni» atty respýblıkalyq ǵylymı-tájirıbelik konferentsııa jáne aqyn Almas Ahmetbekulynyń «Ult urany jáne Uly aqyn» atty kitabynyń tusaýkeseri uıymdastyryldy.
Gúl qoıý rásimine zııaly qaýym ókilderi, ǵalymdar, №2 J.Nájimedenov atyndaǵy mekteptiń ustazdary men oqýshylary qatysty. Al konferentsııaǵa elimizdiń tanymal aqyn-jazýshylary, ǵalymdar, jumekentanýshylar men qoǵam qaıratkerleri jınaldy. Plenarlyq májilisti Qazaqstan Jazýshylar odaǵy basqarmasynyń tóraǵasy Mereke Qulkenov júrgizdi.
Konferentsııanyń ashylý saltanatynda Atyraý oblysy ákiminiń orynbasary Daryn Shamuratov jáne memleket jáne qoǵam qaıratkeri Sársenbaı Eńsegenov sóz sóılep, aqyn murasynyń ulttyq rýhanııattaǵy mańyzyn atap ótti.
Keleli jıyn barysynda aqynnyń qyzy Qarlyǵash Nájimedenova ákesiniń adamı qasıetteri men shyǵarmashylyǵyna toqtaldy.
– Ákem qazaq jáne álem ádebıetin tereń biletin. Maǵan onyń «Kishkentaı», «Dańq pen daqpyrt», «Aqshaǵyl» romandary erekshe unaıdy. Bul shyǵarmalardy oqyǵanda ákemniń beınesi kóz aldyma keledi. Onda soǵys jyldaryndaǵy aýyr kezeńder sýrettelgen. Eger osy romandar jelisimen serıal túsirilse, tamasha týyndy bolar edi, – dedi Qarlyǵash Nájimedenova.
Sonymen qatar synshy, pýblıtsıst Amangeldi Keńshilikuly, professor, jumekentanýshy Qadir Júsip, aqyn Svetqalı Nurjan jáne basqa da qatysýshylar óz baıandamalarynda Jumeken poezııasynyń ulttyq rýhanı keńistiktegi orny men kórkemdik erekshelikterin taldady.
