Atyraýda jiti respıratorlyq vırýstyq ınfektsııalardyń 13 107 jaǵdaıy tirkelgen
ATYRAÝ. KAZINFORM – Atyraý oblysynda jiti respıratorlyq vırýstyq ınfektsııalardyń 13 107 jaǵdaıy tirkelip otyr. Onyń ishinde tumaýǵa jatpaıtyn rınovırýs, adenovırýs, RS vırýsy, paragrıp, bokavırýs aýrýlary bar.
Atyraý oblystyq sanıtarııalyq-epıdemıologııalyq baqylaý departamenti basshysynyń orynbasary Altyngúl Aımuratovanyń málimetinshe, bıyl jergilikti bıýdjet esebinen Reseı Federatsııasynda shyǵarylǵan «Grıppol plıýs» vaktsınasynyń 65 000 dozasy satyp alynǵan.
«Tumaýǵa qarsy maýsymdyq vaktsınatsııalaý 15 qyrkúıekte bastaldy. Osy kezge deıin 59 510 adam tumaýǵa qarsy vaktsına ektirdi. Onyń ishinde 1 023 adam vaktsınany jumys berýshi esebinen alǵan. Vaktsına saldyrǵandaryń arasynda 2 594 júkti áıel, 13 134 bala bar», - dep habarlady Altyngúl Aımuratova.
Infektsıonıst-dáriger Aınur Qazıevanyń aıtýyna qaraǵanda, tumaý ımmýnıteti álsiregen adamdarda, ásirese, balalar men egde jastaǵylar jıi asqynady.
«Balalar men egde jastaǵy adamdarda sımptomdar tezirek damýy jáne zardaby aýyr bolýy múmkin. Keıbir jaǵdaıda tumaýdyń saldarynan bronhıt, pnevmonııa, gaımorıt syrqaty asqynady. Al, egde jastaǵy naýqastarda astma, qant dıabeti jáne júrek aýrýy sekildi sozylmaly aýrýlardyń órshýine ákelip soqtyrady. Tumaý qoǵamdyq oryndarda, mektepterde jáne keńselerde basqalarǵa tez juǵady. Sol sebepten, tumaýdy juqtyrmaýdyń eń tıimdi joly – jyl saıyn ekpe alý», - dep málim etti Aınur Qazıeva.
Eske sala ketelik, budan buryn Atyraý oblysynda tumaýǵa qarsy vaktsınanyń 65 myń dozasy satyp alynǵanyn habarlaǵan bolatynbyz.
