Atyraýda joldyń opyrylýyna sebep bolǵan qubyrdy taba almaı jatyr
KAZINFORM. ATYRAÝ — Atyraý qalasy «Nursaıa» yqshamaýdanynda opyrylǵan jol bóligi áli qalpyna keltirilmedi.
Joldyń opyrylýyna «Nursaıa» yqshamaýdanynda káriz sorǵy stantsııasyn jańǵyrtý jumysy sebep bolǵan.
Jobaǵa sáıkes nysandy jobalaý jáne iske asyrý shekarasy K1-1 qudyǵymen belgilengen. Osyǵan oraı, qoldanystaǵy ózdiginen aǵatyn káriz kollektory K1-1 qudyǵyna qosylýy tıis.
Qusan Narenbaev kóshesindegi tasjoldyń astynan «Atyraý oblysy sý arnasynyń» jáne jer úılerdiń káriz qubyry ótip jatyr. 6,5 metr tereńdikte qubyrlardyń birinen sý ketip jatqany belgili boldy.
Qazirgi ýaqytta bul aýmaqta mamandar káriz sýynyń qaı qubyrdan ketip jatqanyn anyqtaý jumystarymen aınalysyp jatyr.
— Odan ári ınjenerlik jelilerdiń senimdiligi men uzaq merzimde jumys isteýin qamtamasyz etý maqsatynda SDR17 markaly polıetılen qubyrlaryn tartý (protaskıvanıe) ádisimen qoldanystaǵy ózdiginen aǵatyn kollektordy aýystyrý kózdelip otyr. Atalǵan jumys bastapqy joba sheńberinen tys, týyndaǵan avarııalyq jaǵdaıdy joıý jáne onyń qaıtalanýyn boldyrmaý maqsatynda atqarylýda. Qubyrdy aýystyrý jumystary aıaqtalǵannan keıin, ýchaskege topyraq tógilip, tyǵyzdalady. Odan soń tasjol qalypqa keltiriledi. Máseleni sheshýge shamamen 10 kún ýaqyt kerek. Kólik qozǵalysyn jyl sońyna deıin ashý josparlanyp otyr, — dep habarlady Atyraý oblystyq energetıka jáne TÚKSh basqarmasy.
Buǵan deıin Túrkistan oblysynda kópir opyrylǵanyn habarlaǵan edik.