Atyraýda jolaýshylar 2 kúnnen beri usha almaı júr
ATYRAÝ. KAZINFORM – Atyraýda qolaısyz aýa raıyna baılanysty birqatar áýe reısi ýaqytynda usha almaı otyr. 15 qańtarǵa qaraǵan túnnen bastap Hıýaz Dospanova atyndaǵy Atyraý halyqaralyq áýejaıynda reısterdiń keshigýi tirkeldi.
H.Dospanova atyndaǵy Atyraý halyqaralyq áýejaıynyń ókili Dáýlet Eleýsinovtyń aıtýynsha, búginde 9 reıs keıinge shegerilgen. Jolaýshylardyń sózinshe, 15 qańtar kúni SCAT jáne FlyArystan áýe kompanııalarynyń ushaqtary ushyp ketken. Al Air Astana áli de ushý ýaqytyn ózgertip jatyr. Muny áýejaı qyzmetkerleri de rastady.
Áýejaı ishi jolaýshylarǵa toly. Kópshiligi kesheden beri dittegen jerine jete almaı, ábigerge túsken. Áýe kompanııalary men áýejaı ókilderi reısterdiń keshigýin aýa raıymen jáne ushyp-qoný jolaǵyn tazalaý jumystarynyń jalǵasyp jatqanymen túsindirdi. Máselen, keshe Almatyǵa ushýy tıis bolǵan jolaýshylar áýejaıda 12 saǵattan astam ýaqyt kútken. Olardyń aıtýynsha, ushý ýaqyty saǵat saıyn ózgerip, aqyry reıs oryndalmaǵan. Qazirgi jospar boıynsha bul reıs búgin keshki saǵat 21:00 shamasynda júzege asýy tıis. Alaıda jolaýshylar bul ýaqytqa da kúmánmen qarap otyr. Atyraý qalasynyń turǵyny Janar Shalqarovanyń aıtýynsha, olar keshe tańǵy saǵat 8:30-dan túngi 02:00-ge deıin áýejaıda otyrǵan.
– Biz keshe, 15 qańtar kúni Almatyǵa ushýymyz kerek edi. Tańǵy 8:30-dan beri áýejaıda júrmiz. Túngi saǵat 02:00-ge deıin boldyq. Bortqa aparyp, qaıta ákeldi. Alǵashynda qar tazalaý jumystary aıaqtalǵannan keıin ushamyz dedi. Odan soń «ekıpajdyń jumysy aıaqtaldy, ushqyshtar sharshady» dedi. Al SSAT pen FlyArystan ushyp jatyr. Sonda olardyń ushqyshtary sharshamaı ma? Air Astana ushqyshtary nege sharshaıdy dedik. Bizge «olar – áskerı adamdar» dep jaýap qatty, - dep pikir bildirdi Atyraý qalasynyń turǵyny Janar Shalqarova.
Áýejaı ókilderiniń málimetinshe, keshiktirilgen 9 reıstiń altaýy Air Astana, úsheýi SSAT áýe kompanııasyna tıesili. Sonymen qatar keıbir áýe kemeleri Atyraýǵa qona almaı, kórshi óńirlerdiń áýejaılaryna baǵyttalǵan. Buǵan ushyp-qoný jolaǵynyń daıyn bolmaýy sebep bolǵan. Jolaýshylar arasynda basqa qalalar arqyly shetelge shyǵýy tıis azamattar da kóp. Olardyń aıtýynsha, qosymsha bıletteri kúıip, josparlanǵan issapar men demalys keıinge shegerilgen. Atyraý qalasynyń taǵy bir turǵyny Juldyz Qatarovanyń aıtýynsha, reıstiń saǵat saıyn keıinge qaldyrylýy josparlanǵan otbasylyq demalysqa da ,balalarynyń densaýlyǵyna da áser etken.
– Biz bul jerde 12 saǵat otyrdyq, kete almadyq. Bir-eki saǵat saıyn keıinge shegerip otyrdy. Eger túngi ekide ushamyz dese, úıden kúter edik. Biraq ár saǵat saıyn keıinge qaldyrǵan soń, áýejaıdan shyǵa almadyq. Sol sebepti balalarym aýyryp qaldy. Munda 4 balamen júrgen jalǵyz menmin. Áýekompanııasy máseleni týroperatorlarǵa ysyryp otyr. Biraq munda týroperatordyń kinási joq, - deıdi ol.
Al Air Astana jolaýshylary kompanııa tarapynan tıisti jaǵdaı jasalmaǵanyna shaǵymdandy. Áýe kompanııasy jolaýshylardy qonaqúımen jáne tamaqpen qamtamasyz etken. Alaıda azamattar tamaqtyń sapasy men qonaqúı jaǵdaıyna kóńilderi tolmaıtynyn aıtty.
– Air Astana tarapynan eshqandaı jaǵdaı jasalǵan joq. Qonaqúıge apardy, biraq ol qonaqúıde turý múmkin emes, jaǵdaıy óte nashar. Tamaq ta dámdi emes. Biz ekinshi táýlik boıy osylaı júrmiz. Barlyǵy áýejaıǵa silteıdi. Al Atyraý áýejaıy joldy tazalap jatyr. Tipti túnde bizge ystyq tamaq uıymdastyrdy. Áreket etip jatqan – áýejaı. Al Air Astana múlde qozǵalyssyz. Búgin 11-de ushamyz dedi, keıin 12:55 dedi, endi 20:50-de ushamyz deıdi. Bárimizdiń sharýamyz bar. Keıbiri shetelge ushýy kerek edi. Olardyń bıleti kúıip ketti, - dedi jolaýshy Aıda Osmanova.
Al Atyraý halyqaralyq áýejaıy ókilderi reısterdiń keshigýine tabıǵı qubylystar sebep bolǵanyn alǵa tartty. Hıýaz Dospanova atyndaǵy Atyraý halyqaralyq áýejaıynyń ushý qaýipsizdigin qamtamasyz etý jónindegi ınjeneri Andreı Vengrınıýk mundaı jaǵdaıdyń sırek kezdesetinin aıtty. Halyqaralyq azamattyq avıatsııa komıtetiniń (IKAO) kodyna sáıkes onyń jaǵdaıy «nóldik» deńgeıde baǵalanyp, qaýipsizdik maqsatynda reıster ýaqytsha toqtatylǵan.
– 14 qańtardan bastap jumystar júrgizilip keledi. Sol kúni keshki saǵat 20:00-de jolaqty tazalap, birneshe áýe kemesin qabyldadyq. Biraq túnde jaýyn-shashyn qaıta kúsheıdi. Qar men jańbyr aralasyp jaýdy, kóktaıǵaq paıda boldy. Mundaı jaǵdaı óte sırek kezdesedi. Men bul salada 40 jyldan beri eńbek etemin, osyndaı jaǵdaı ekinshi ret qana bolyp otyr. Buǵan deıin shamamen 9–10 jyl buryn bolǵan. Keshe Almatyǵa ushýy tıis reıske kelsek, jolaq daıyn boldy. Alaıda ekıpajdyń jumys ýaqyty aıaqtalǵandyqtan, reıs keıinge qaldyryldy. Bul – áýe kompanııasynyń ishki tártibi, - dedi ol.
Áýejaı málimetinshe, ushyp-qoný jolaǵyn tazalaýǵa arnaıy tehnıka tartylyp, 23 tonnadan astam arnaıy hımııalyq reagent sebilgen.
Air Astana kompanııasynyń Atyraýdaǵy qyzmetkerleri máselege qatysty túsinik bermedi. Al osyǵan deıin áýekompanııasy áleýmettik jeli arqyly ushý-qoný aımaǵynyń talapqa sáıkes bolmaýyna baılanysty Atyraýǵa qatysty reıster aýystyrylǵanyn málimdegen edi.
Osyǵan deıin Atyraýda FlyArystan ushaǵy arnaıy jolaqtan shyǵyp ketkeni jóninde jazǵan edik.