Atyraýda jol jáne ınfraqurylym salasyna 90 mln teńge zalal keltirilgen

Atyraý oblysynda jemqorlyq táýekeli kartasyna 9 másele engizilgen. Al, jol jáne ınfraqurylym salasynda 90 mln teńgeniń zalaly qaıtarylǵan, dep habarlaıdy Kazinform.

Sybaılas jemqorlyqqa qarsy is-qımyl agenttiginiń Atyraý oblystyq departamenti basshysynyń birinshi orynbasary Nurlan Jahınniń aıtýynsha, «Bızneske jol» jobasy aıasynda 500-ge jýyq kásipkermen kezdesý ótkizilgen. Kásipkerler tarapynan 81 ótinish túsken. 

«Memlekettik apparattyń aldyna azamattardyń ál-aýqatyn jaqsartýdy qamtamasyz etý maqsaty qoıyldy. Sol sebepten, agenttik tarapynan sybaılas jemqorlyq táýekelderi kartasy jasaqtaldy. Qazir Atyraý oblysyndaǵy problemalyq máselelerge basa kóńil bólinip, atalǵan kartaǵa 9 másele engizildi. Bul – ekologııa, olıgopolııa, jol jáne ınfraqurylym, medıtsına, bıznesti qorǵaý, apatty jáne tozyǵy jetken turǵyn úı, agroónerkásiptik keshen, jylý elektr stansalar men merzimi uzaqqa sozylǵan qurylys nysandary», - dep habarlady Nurlan Jahın.

Onyń aıtýyna qaraǵanda, departamenttiń usynysynan keıin óńirge kelgen dárigerler sany 2 esege ósken. Dárigerler úshin turǵyn úı jaǵdaıy jaqsartylǵan. Al, olıgopolııa salasynda iri kásiporyndarǵa jumysqa ornalasý kezinde anyqtalǵan jemqorlyq derekteri joıylǵan. 

«Departament qyzmetkerleriniń yqpalymen jol jáne ınfraqurylym salasynda 90 mln teńgeden astam zalal qaıtaryldy. Zań buzýshylyqtar joıylyp, tıisti jumystar oryndaldy. Bıznesti qorǵaý maqsatynda 900-den astam kásipkerdiń quqyǵy qalpyna keltirildi. Kásipkerlerge shamamen 1 mlrd teńgeniń bereshek tólemderi óteldi», - dep málim etti Nurlan Jahın. 

Eske sala ketelik, budan buryn Atyraý oblysynda kásipkerler qandaı kedergige jıi tap bolǵanyn habarlaǵan edik.