Atyraýda jol qozǵalysyn rettep turǵan polıtseıdi kólik qaǵyp ketti

ATYRAÝ. KAZINFORM – Atyraýda jol qozǵalysyn rettep turǵan polıtseıdi kólik qaǵyp qulatty. Polıtsııa qyzmetkeri túrli dene jaraqatymen aýrýhanaǵa jetkizildi.

Atyraý oblystyq polıtsııa departamentiniń baspasóz qyzmetinen málim etkendeı, oqıǵa 30 qyrkúıekte bolǵan.

«Keshki saǵat 18:40 shamasynda Toyota Corolla avtokóliginiń júrgizýshisi Atyraý qalasyndaǵy Q.Satpaev-Ernııazov kósheleriniń qıylysynda patrýldik polıtsııa batalonynyń qyzmetkerin qaǵyp qulatqan. Sol sátte polıtsııa qyzmetkeri jol qozǵalysyn rettep turǵan. Túrli dene jaraqatyn alǵan polıtsııa qyzmetkeri oblystyq aýrýhanaǵa jetkizildi», -dep habarlady departamenttiń baspasóz qyzmeti.

Qazir jol-kólik oqıǵasyna qatysty tıisti is-qujattar jınaqtaldy. Saraptamalar qorytyndysyna sáıkes sheshim qabyldaý úshin sotqa joldanatyn bolady.

«Jol-kólik oqıǵasyna sebepker bolǵan kólik júrgizýshisi kózi kúnge shaǵylysqandyqtan, patrýldik polıtsııa qyzmetkerin kórmeı qalǵanyn aıtady. Biraq, bul jaýapkershilikten qutqarmaıdy», - dep málim etti departamenttiń baspasóz qyzmetinen.

Eske sala ketelik, budan buryn Atyraýda ákesi men qyzynyń ólimine kináli KamAZ júrgizýshisi 5 jylǵa sottalǵanyn habarlaǵan edik.