Atyraýda jol apatynan jaıaý adam men júrgizýshi mert boldy
Atyraýda bir kúnde eki jol-kólik oqıǵasy tirkeldi. Jol-kólik oqıǵasynyń saldarynan 49 jastaǵy jaıaý júrginshi men júrgizýshi mert boldy, dep habarlaıdy Kazinform.
Oblystyq polıtsııa departamentiniń baspasóz qyzmetinen málim etkendeı, eki jol-kólik oqıǵasy keshe, 19 qarashada bolǵan.
«Jergilikti ýaqytpen saǵat 18:30 shamasynda Atyraý-Damby tas jolynyń boıynda Toyota Hilux avtokóligi jaıaý júrginshiler jolaǵy joq tustan ótpek bolǵan 1974 jylǵy jaıaý júrginshini qaǵyp qulatqan. Saldarynan jaıaý júrginshi oqıǵa ornynda qaza tapty», - dep habarlady departamenttiń baspasóz qyzmeti.
Ekinshi jol apaty túngi saǵat 23:00 shamasynda tirkelgen.
«Atyraý qalasyndaǵy Isataı Taımanov kóshesiniń boıynda «VAZ – 2115 jáne «GAZel» avtokólikteri soqtyǵysty. Soqtyǵys saldarynan «GAZel» avtokóliginiń júrgizýshisi túrli jaraqatpen oblystyq aýrýhanaǵa jetkizildi. Al, «VAZ – 2115» avtokóliginiń júrgizýshisi oqıǵa ornynda mert boldy», -dep málim etti departamenttiń baspasóz qyzmetinen.
Qazir jol-kólik oqıǵasynyń sebebin anyqtaý úshin tıisti qujattardy jınaqtap jatyr.
Eske sala ketelik, budan buryn Atyraýda júk kóligimen ınspektordyń aıaǵyn basyp, polıtsııadan qashqan júrgizýshi oq atyp toqtatylǵanyn jazǵan bolatynbyz.
