Atyraýda jol apaty saldarynan eki adam kóz jumdy
ATYRAÝ. KAZINFORM — Atyraýda Volkswagen Polo jáne Gazel avtokólikteri soqtyǵysyp, saldarynan eki adam qaza tapty.
Atyraý oblystyq polıtsııa departamentiniń málimetinshe, jol-kólik oqıǵasy 16 qarasha kúni saǵat 03:30 shamasynda Isataı Taımanov pen Ǵabbas Berǵalıev kósheleriniń qıylysynda bolǵan.
Apat saldarynan Volkswagen Polo avtokóliginiń júrgizýshisi men jolaýshysy oqıǵa ornynda kóz jumdy.
Qazirgi ýaqytta polıtsııa qyzmetkerleri oqıǵaǵa qatysty qajetti qujattardy jınaqtap jatyr.
Polıtsııa júrgizýshilerdi jol qozǵalysy erejelerin saqtaýǵa jáne kólik júrgizý kezinde belgilengen jyldamdyqty asyrmaýǵa shaqyrdy.
Eske salaıyq, 11 qarasha kúni Atyraý qalasyndaǵy Vodnık-3 yqshamaýdanynda jaıaý júrginshini kólik qaǵyp ketti. Oqıǵa saldarynan áıel kóz jumdy.