Atyraýda joǵalǵan úsh adamdy izdeýge tikushaq tartyldy
Atyraý oblysynda keshe joǵalyp ketken úsh adam tikushaqpen izdestirilip jatyr, dep habarlaıdy Kazinform.
Oblystyq tótenshe jaǵdaılar departamenti qoǵammen baılanys tobynyń málimetinshe, úsh adam 9 qańtarda saǵat 11:00 shamasynda «Toyota» markaly avtokóligimen jolǵa shyǵyp, habar-osharsyz ketken.
«Úsh adam Maqat aýdanyndaǵy Dossor kentinen Qyzylqoǵa aýdanynyń Qarabaý aýylyna qaraı jolǵa shyǵyp, túnge deıin oralmaǵan. Telefon baılanysy joq. Bul týraly búgin, 10 qańtarda saǵat 00:00-de joǵalǵan adamdardyń týystary Atyraý oblystyq TJD aýmaqtyq bólimshesine habar berdi»,- dep habarlady departamenttiń qoǵammen baılanys toby.
Qazir Atyraý oblysynyń TJD kúshteri joǵalǵan 1984, 1986 jáne 1996 jylǵy úsh adamdy izdestirip jatyr. Búgin 10 qańtarda saǵat 13:26-da izdestirý-qutqarý jumystaryna «QazAvıaQutqarý» AQ-nyń MI-8 tikushaǵy tartyldy. Tikushaq bortynda TJD-nyń 4 qyzmetkeri, joǵalǵandardyń týystary men ekıpajdyń 5 múshesi bar.
