Atyraýda joǵalǵan otbasynyń qyzy men kúıeýbalasy da shetel asyp ketken
ATYRAÝ. KAZINFORM — Atyraý oblysy Qyzylqoǵa aýdanynda joǵalǵan otbasy músheleriniń esepshoty ýaqytsha buǵattalady. Bul týraly Atyraý oblystyq PD bastyǵynyń orynbasary Quttybaı Sadyqov málimdedi.
PD málimetinshe, izdestirý jumysy tek Atyraýda ǵana emes, Qazaqstan boıynsha uıymdastyrylǵan. El aýmaǵyndaǵy túrli emdelý oryndary tekserilip jatyr.
4 azamattyń nómiri Shymkent qalasynda qosylǵan. Sol aýmaqtarda izdeý jumysy jalǵasyp jatyr. Polıtseılerdiń sózinshe, olar Ózbekstanǵa ketpek bolǵan. Alaıda shekaradan ótpegen.
— Otbasy múshesi, sol úıdiń balasy Naýryz Muqanǵalıev týysymen messendjer arqyly sóılesken. Sol kezde «ata-anamdy emdetip jatyrmyn, ýaıymdamańyzdar, 10 jeltoqsanǵa deıin em-dom alady» degen. Joǵalǵan azamattyń bári — Qyzylqoǵa aýdanynyń turǵyndary. Jaǵdaıy — ortasha. Bárine aı saıyn zeınetaqy túsedi. Qarjylyq másele joq dep esepteımin. Olardy eshkim bopsalamaǵan. Taǵy bir aıta ketetin jaıt, bul otbasy jaıly, tynysh bolǵan. Mal baǵyp, zeınetaqy alyp, kúnin kórip otyrǵan qarapaıym azamattar, — dedi oblystyq PD bastyǵynyń orynbasary Quttybaı Sadyqov.
PD bul tórt adamnan bólek sol úıdiń qyzy men kúıeý balasynyń Ózbekstanǵa, odan keıin basqa elge ketkenin anyqtady. Ázirge bul erli-zaıyptynyń jaqyndary olardyń joǵalý deregi boıynsha polıtsııaǵa aryzdanbaǵan.
Joǵalǵan otbasynyń kúıeýbalasy óziniń týǵan anasyna áıelin emdeýge alyp ketkenin aıtqan. Ekeýiniń 5 balasy qazir Mahambet aýdanynda anasynyń qaraýynda qalǵan.
Polıtsııa departamenti qazirgi ýaqytta tórt azamattyń joǵalǵany týraly isti QR Qylmystyq kodeksiniń adam óltirý baby boıynsha tergep jatyr.
4 azamat pen sol úıdiń taǵy bir qyzy men kúıeý balasynyń joǵalý faktisiniń bir-birine baılanysy boıynsha PD ókilderi QR Qylmystyq kodeksiniń 201 babyna sáıkes aqparat aıtpady.
Quqyq qorǵaý ókilderi joǵalǵan azamattar destrýktıvti din ókilderi emestigin málimdedi.
Aıta keteıik, joǵalǵan otbasyny izdestirý jumysy ótken jyldyń 25 jeltoqsanynda bastaldy. Óıtkeni olardyń týysynan aryz sol kúni túsken.