Atyraýda joǵalǵan otbasy jóninde tyń málimet taratqan haker Túrkııadan ekstradıtsııalanady
ATYRAÝ. KAZINFORM – Atyraý oblysynda ótken jyly joǵalyp ketken otbasy týraly áleýmettik jeli arqyly tyń derekter taratqan haker Túrkııada ustaldy.
Prokýratýra málimetinshe, polıtsııa departamenti Tergeý basqarmasynyń óndirisinde Qylmystyq kodekstiń 190-baby (alaıaqtyq) boıynsha birneshe qylmystyq is tergelip jatyr. Tergeý deregine sáıkes, kúdikti J.N. túrli syltaýlardy alǵa tartyp, azamattardyń aqshasyn ıemdengen.
- Ol ózin ınvestıtsııa salýǵa múmkindik baryn aıtyp, IT salasynda oqytý, buǵattalǵan akkaýnttardy ashyp berý, qarajatty shyǵaryp alýǵa kómektesý jáne tehnıka satý sııaqty qyzmetterdi usynyp, jábirlenýshilerdiń senimine kirgen. Osylaısha, birneshe epızod boıynsha keltirilgen jalpy shyǵyn kólemi 13,7 mln teńgeden asqan, - dep málimdedi oblys prokýratýrasynyń baspasóz qyzmeti.
2026 jylǵy 9 qańtarda Atyraý qalasynyń mamandandyrylǵan tergeý soty kúdikti J.N.-ǵa qatysty syrttaı qamaýda ustaý túrindegi bultartpaý sharasyn sanktsııalady. Sol kúni ol halyqaralyq izdeýge jarııalandy.
2026 jylǵy 19 aqpanda Interpoldyń Ulttyq ortalyq bıýrosynyń málimetine sáıkes, kúdikti Túrkııanyń Samsýn qalasynda ustaldy.
Qazir Qazaqstan Respýblıkasy Bas prokýratýrasy kúdiktini Qazaqstanǵa ekstradıtsııalaý týraly suraý salý jiberý úshin tıisti ótinish joldaǵan.
Buǵan deıin Atyraýda joǵalǵan otbasynyń ul-qyzynyń múrdesinen úshkir zattyń izderi baıqalǵanyn jazǵan edik.