Atyraýda joǵalǵan otbasy: Meıramgúl men Naýryzdyń denesi kúdiktiler jaldaǵan úıdiń irgesinen tabyldy
ATYRAÝ. KAZINFORM – Atyraý oblysy Jangeldın aýylynda joǵalyp ketken bútin bir otbasynyń taǵy eki múshesiniń denesi tabyldy. Olardyń múrdesi sol úıdiń kúıeýbalasy Sultan Sársemalıev pen qyzy Aqbaıan Muqanǵalıeva jaldap turǵan úıdiń aýlasynan shyqty. Al bul aýmaqty osydan 2 aı buryn polıtsııa qyzmetkerleri túrli ádispen, tehnıkalardyń kómegimen tekserip ketken edi.
Mınıstrliktiń aqparatyna súıensek, Sultan Sarsemalıev ustalǵannan keıin qylmysyn moıyndap, tergeý toby onyń kórsetýi boıynsha qaıtadan tergeý áreketterin júrgizgen. Nátıjesinde Atyraý qalasyndaǵy úıdiń aýlasynan buryn habar-osharsyz ketken ul men qyzdyń máıiti tabyldy.
— Tórt adamdy óltirýge uzaq ýaqytqa sozylǵan turmystyq janjaldar sebep bolǵan. Tergeý eki nemese odan da kóp adamdy óltirý baby boıynsha júrgizilýde jáne mınıstrliktiń baqylaýynda, — dedi QR ІІM Krımınaldyq polıtsııa departamentiniń bastyǵy Qanat Nurmaǵambetov.
Qazirgi ýaqytta múrdeler Atyraý oblysy boıynsha sot saraptamalar ınstıtýtynda. Marqumdardyń jaqyndary Meıramgúl Qarabalına men Naýryz Muqanǵalıevtiń aman-esen tabylatynynan úmit bolǵanyn jasyrmady. Endi súıekterdi Jangeldın aýylyna jerlemek.
— 9 naýryz kúni 17:00 shamasynda quqyq qorǵaý organdarynyń ókilderi habarlasyp, Meıramgúl men Naýryzdyń denesi tabylǵanyn aıtty. Morgke tapsyryldy dedi.Mundaǵy qyzmetkerlerdiń tekserisi keshke deıin aıaqtalsa súıekti beremiz degendeı boldy.Estigende ońaı tıgen joq. Bálkim tiri shyǵar degen úmit bolǵan. Alaıda sýyq habardy estidik. Baýyrlarymyzdy aǵa-jeńgemizdiń qasyna jerleıtin bolamyz, — dedi týysy Shalqar Muqanǵalıev.
Shalqar Muqanǵalıevtiń aıtýynsha, Aqbaıan Muqanǵalıeva psıhıkalyq aýrýhanaǵa jatqyzylǵan. Polıtsııa tergeý amaldary jalǵasyp, erekshe baqylaýda turǵanyn málimdedi. Sondaı-aq otbasynyń kenje qyzynyń bul iske qatysy bar-joǵy tekserilýde. Onyń psıhıkalyq jaǵdaıyn anyqtaý qajettiligine baılanysty sot-psıhıatrııalyq saraptama júrgizý úshin medıtsınalyq uıymǵa jiberilgen.
Sultan Sarsemalıev pen onyń burynǵy jubaıy, marqumdardyń qyzy Aqbaıan Muqanǵalıeva keshe Atyraý qalasyna jetkizilgen edi. Olar Almaty-Atyraý baǵytymen ushyp kelgen.
Kúdiktiler aqpan aıynyń sońynda Indonezııa Respýblıkasynyń Lombok aralyndaǵy Senarý aýylynda asa aýyr qylmys jasady dep kúdikke ilingender ustalǵan edi.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy. Keıin olardyń denelerinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Aqpan aıynyń basynda kúdiktiń 5 balasy memleket qamqorlyǵyna alyndy.
Qandy qylmysqa qatysy bolýy múmkin degen kúdikke sol úıdiń qyzy da ilindi.
Eki kúdiktiniń shetelde qalaı ustalǵany jóninde vıdeo jarııalandy.
