Atyraýda joǵalǵan otbasy: kúdiktige izdeý jarııalandy

ATYRAÝ. KAZINFORM – Atyraý oblysynda Jangeldi aýylynyń turǵyndaryn óltirý deregi boıynsha kúdiktige izdeý jarııalandy. Bul týraly oblystyq PD habarlady.

Qylmysqa kúdikti – Atyraý oblysy Mahambet aýdanynyń 29 jastaǵy turǵyny. Sondaı-aq ózge de tulǵalardyń qatystylyǵy tekserilip jatyr. 

– 25 jeltoqsanda polıtsııaǵa atalǵan otbasynyń joǵalyp ketkeni týraly olardyń týystary habarlasqan. Áleýmettik jeli qoldanýshylaryn aqparatty tek resmı derekkózderden alýǵa jáne jalǵan ne rastalmaǵan málimetterdi taratýdan bas tartýǵa shaqyramyz, - dep málimdedi PD. 

Aıta keteıik, joǵalǵan otbasyny izdestirý jumysy byltyr 25 jeltoqsanynda bastaldy. Óıtkeni olardyń týysynan aryz sol kúni túsken. Osyǵan baılanysty Atyraý oblysynda bir otbasynyń músheleri izdestirilip jatqanyn habarlaǵan edik. Sondaı-aq Atyraý oblysy Qyzylqoǵa aýdanynda joǵalǵan turǵyndardyń esepshoty ýaqytsha buǵattalatynyn, sol úıdegi qyz ben kúıeýbalanyń shetel asyp ketkenin jazǵanbyz. 

Kóp ótpeı joǵalǵan otbasydaǵy erli-zaıyptynyń denesi saraıdan tabylǵanyn habarladyq.