Atyraýda joǵalǵan boıjetkendi Jaıyq ózeninen izdeý 44 kúnnen keıin toqtatyldy

ATYRAÝ. KAZINFORM – Atyraýda iz-túzsiz joǵalyp ketken 23 jastaǵy boıjetken áli tabylǵan joq. Jergilikti qutqarýshylar boıjetkendi Jaıyq ózeninen izdeýdi 44 kúnnen soń toqtatty. 

Bul derekti Atyraý oblystyq tótenshe jaǵdaılar departamentiniń qoǵammen baılanys toby rastady. 

– Polıtsııa qyzmetkerleriniń usynysyna sáıkes kómek kórsetý maqsatynda tótenshe jaǵdaılar departamentiniń qutqarýshylary 22 qazanda izdestirýdi bastaǵan edi. Joǵalyp ketken boıjetkendi izdeý jumysyna 20-dan astam qyzmetker, 5 tehnıka, 7 sý kóligi men ushqyshsyz ushý apparaty tartyldy. Іzdeý operatsııasy aıasynda Jaıyq ózeniniń jaǵalaýy muqııat tekserildi. Sý aıdynynyń túbinnen 4,5 myń sharshy metrden astam aýmaq súzildi. Tótenshe jaǵdaılar departamentiniń qyzmetkerleri polıtsııa departamenti kórsetken orynnan aǵys boıymen 30 shaqyrym qashyqtyqtaǵy akvatorııada izdestirý-qutqarý jumystaryn júrgizdi, - dep habarlady departamenttiń qoǵammen baılanys toby. 

Sondaı-aq ózen túbin egjeı-tegjeıli zertteý úshin súńgýirler eholot qoldanǵan. Іzdeý jumysyna qyzmettik ıtter men kınologııalyq top qatysqan. Qutqarýshylarmen birge izdeýge polıtsııa departamentiniń qyzmetkerleri, Ulttyq ulannyń áskerı qyzmetshiler men eriktiler kómektesken. 

– Іzdeý jumysy 44 kún boıy toqtaýsyz júrgizilgenine qaramastan esh nátıje bolmady. Aýa raıynyń qubylyp, sýytýy sý kólikteriniń tehnıkalyq jaı-kúıine áser etetini eskerilip, 4 jeltoqsanda 2001 jylǵy boıjetkendi izdeý toqtatyldy, - dep málim etti departamenttiń qoǵammen baılanys tobynan. 

Eske sala ketelik, budan buryn Atyraýda 23 jastaǵy boıjetkendi izdep jatqanyn habarlaǵan edik. 

Keıin 23 jastaǵy boıjetkenniń iz-túzsiz joǵalýyna baılanysty eki kúdikti ustaldy. 

Al, 22 qazanda jergilikti qutqarýshylar joǵalǵan arýdy izdeýge kiriskenin jazǵan edik.