Atyraýda joǵalǵan azamattyń denesi Jaıyqtan tabyldy

ATYRAÝ. KAZINFORM — Atyraý oblysynda joǵalǵan 59 jastaǵy azamattyń denesi 19 kúnnen keıin tabyldy.  9 qańtarda joǵalǵan adamnyń denesi jeke zattary tabylǵan orynnan 100 metrge jýyq qyshyqtyqta Jaıyq ózeninen 2 metr tereńdikten shyǵaryldy. 

Atyraý oblystyq TJD málimetinshe, keıin er adamnyń denesi polıtsııa qyzmetkerlerine tapsyryldy.

Іzdestirý-qutqarý jumystary aıasynda Jaıyq ózeniniń jaǵalaýyn, ózen túbin egjeı-tegjeıli zertteý maqsatynda qutqarýshylar súńgý, sý asty dronymen ózendi qaraý jumystaryn júrgizdi. Alaıda alǵashynda izdestirý jumystary nátıje bermedi.

— Sý aıdynyndaǵy qolaısyz jaǵdaılar, sý asty aǵysynyń qatty bolýy, kóriný deńgeıiniń tómendigi jáne gıdrologııalyq jaǵdaıdyń kúrdeliligi izdeý jumystaryna kedergi keltirdi. Qutqarýshylar barlyq qaýipsizdik talapty saqtaı otyryp, múmkin bolǵan barlyq sharany qabyldady, — dep málim etti TJD baspasóz qyzmeti.

Іzdeý jumystaryna qutqarýshylar, polıtsııa qyzmetkerleri, UU № 5546 áskerı bólimi sarbazdary, eriktilerden barlyǵy 25-ten astam adam, 9 tehnıka, 1 júzý quraly, 2 kınologııalyq eseptop, 1 sý asty drony, ushqyshsyz ushý apparaty tartyldy.

Eske salaıyq, Atyraý qalasyna em alýǵa kelgen Maqat aýdanynyń turǵyny Talǵat Nazarov 9 qańtar kúni shamamen saǵat 13:30–da Kókarna aýylyndaǵy qyzynyń úıinen shyǵyp ketip, qaıta oralmaǵan.

Týystary sol mańdaǵy beınebaqylaý kameralary arqyly onyń Jaıyqtyń jaǵasymen jaıaý ketip bara jatqanyn anyqtaǵan. Kelesi kúni jaǵalaý boıynan bas kıimi men telefony tabylǵan edi.