Atyraýda jylý tarıfi ózgerýi múmkin
ATYRAÝ. KAZINFORM — Atyraýda jylý energııasyn berý, taratý jáne ótkizý qyzmetiniń tarıfi 1 qazannan bastap kóterilýi múmkin. Bul týraly «Atyraý jylý júıeleri» JShS uıymdastyrǵan jarııa tyńdaý barysynda aıtyldy.
Qazir Atyraýda turǵyndar úshin jylý energııasynyń ortasha tarıfi 1 Gkal úshin — 5 786 teńge. Usynys maquldanǵan jaǵdaıda bul kórsetkish 7487 teńgege deıin ósýi yqtımal.
Kompanııa ókilderiniń aıtýynsha, tarıftiń ózgerýi jylý jelilerin jańǵyrtýǵa baǵyttalǵan ınvestıtsııalyq jumyspen baılanysty. Atap aıtqanda, «Energetıkalyq jáne kommýnaldyq sektorlardy jańǵyrtý» ulttyq jobasy aıasynda 2026-2027 jyldary 7,99 shaqyrym jylý qubyryn aýystyrý josparlanǵan.
«Atyraý jylý júıeleri» JShS dırektorynyń orynbasary Mereı Shákirovtiń aıtýynsha, bul jumys jylý jelileriniń tozý kórsetkishin tómendetýge múmkindik beredi.
— 2026-2030 jyldarǵa arnalǵan ınvestıtsııalyq baǵdarlamamyzda jyl saıyn eki shaqyrym ǵana jylý qubyryn aýystyrý kózdelgen. Bul tozý kórsetkishin aıtarlyqtaı tómendetýge áser etpeıdi. Al ulttyq joba aıasynda 2026-2027 jyldary 7,99 shaqyrym jylý qubyryn aýystyramyz. Bul tozý kórsetkishine úlken áser beredi. Munda bir ýchaskeni tolyq qamtımyz, — dedi Mereı Shákirov.
Qazirgi tańda Atyraýdaǵy magıstraldyq jylý jelileriniń tozý deńgeıi — shamamen 62,3 paıyz. Kompanııa málimetinshe, aldaǵy jyldary apatty jaǵdaılardy azaıtyp, qubyrlardyń tozý deńgeıin tómendetý kózdelip otyr.
2030 jylǵa deıin jylý jelileriniń tozý kórsetkishin 50 paıyzǵa deıin túsirý josparda bar.
Degenmen tarıftiń 31 paıyzǵa kóterilýi ázirshe túpkilikti bekitilgen joq. «Atyraý jylý júıeleri» JShS tarıf ózgertý týraly ótinishin Tabıǵı monopolııalardy retteý komıtetiniń Atyraý oblysy boıynsha departamentine usynǵan. Qorytyndy sheshim qazan aıyna deıin qabyldanýǵa tıis.
Buǵan deıin prokýratýranyń yqpalymen Qostanaı oblysyndaǵy aýylda aýyz sý tarıfi 45 eseden astam tómendetilgenin jazǵan edik.
