Atyraýda jylý baǵasy 5 qazannan bastap jańa tarıfpen esepteledi
ATYRAÝ. KAZINFORM – Atyraýda jylýmen jabdyqtaý tarıfi 5 qazannan bastap 5 paıyzǵa ósedi. Turǵyndar úshin 1 Gkal jylý quny 5 347,79 teńgeden 5 615,18 teńgege deıin qymbattaıdy.
«Atyraý jylý júıeleri» JShS-niń habarlaýynsha, tarıftiń ózgerýine qyzmetkerlerdiń eńbekaqysyna jumsalatyn shyǵyndardyń ósýi, elektr energııasy qunynyń artýy jáne «Atyraý jylý elektr ortalyǵy» JShS-niń jylý energııasyn óndirý tarıfiniń ósýi áser etken.
Tabıǵı monopolııalardy retteý komıtetiniń Atyraý oblysy boıynsha departamenti tarıftik ótinimdi qaraý kezinde kompanııa usynǵan shyǵyndarǵa ekonomıkalyq taldaý júrgizgen.
Eske salaıyq, «Atyraý jylý júıeleri» JShS bastapqyda tarıfti 31 paıyzǵa kóterýdi usynǵan bolatyn. Alaıda ótinishti qaraý jáne shyǵyndardyń negizdiligin taldaý nátıjesinde tarıfti tómenirek deńgeıde kóterý týraly sheshim qabyldandy.
- Qazirgi tańda kompanııa qyzmetkerleriniń jalaqysyn ósirý jáne elektr energııasy baǵasynyń ósýine baılanysty jeke tulǵalar úshin 5, zańdy tulǵalar úshin 10, bıýdjettik mekemeler úshin 16 paıyzǵa ósirýge kelistik. Ulttyq joba boıynsha qarastyrylǵan shyǵyndardy eskergen joqpyz. Ol boıynsha áli taldaý júrgizilip jatyr, – dedi QR UEM Tabıǵı monopolııalardy retteý komıtetiniń Atyraý oblysy boıynsha departamentiniń bólim basshysy Janar Dáribaeva.
Jańa jylý tarıfi 2026 jylǵy 5 qazannan bastap qoldanysqa engiziledi.
Sonymen qatar jýyqta Atyraýda elektr energııasynyń tarıfi de ózgerdi. Turmystyq tutynýshylar úshin elektr energııasyn bólshek saýdada ótkizý qyzmetiniń baǵasy kVt/saǵatyna 24,52 teńge mólsherinde kelisilgen. Baǵa QQS-syz kórsetilgen. Osylaısha tarıf 10 paıyzǵa nemese 2,23 teńgege ósti.
Departament ókiliniń túsindirýinshe, elektr energııasynyń tarıfin bekitý kezinde tutynýshylar sanattary arasyndaǵy júkteme de eskerilgen. Esesine qalǵan shyǵyn kásipkerler men bıýdjettik mekemelerdiń qaltasynan óteledi.
- Halyqqa tarıfti kóterý máselesinde zańdy tulǵalar men bıýdjettik mekemelerge de júkteme qarastyrylady. Mysaly, jeke turǵyndar úshin 10 paıyzǵa, zańdy tulǵalar úshin 25 paıyzǵa, bıýdjettik mekemeler úshin 61 paıyzǵa deıin ósim bekitildi, – dedi Janar Dáribaeva.
Buǵan deıin atyraýlyqtar elektr energııasy men jylý tarıfin kóterý usynysyna qarsylyq bildirdi. Olar tarıfti ósirýge negiz bolǵan shyǵyndardyń tolyq ári ashyq kórsetilýin talap etip, qyzmet quny qymbattaǵanymen, jelilerdiń tozýy men qyzmet sapasyna qatysty máselelerdiń áli sheshilmegenin aıtqan edi.
