Atyraýda jylytý qazandyǵy jarylyp, bir adam aýrýhanaǵa jetkizildi
ATYRAÝ. KAZINFORM – Atyraý qalasynyń Avangard-2 yqshamaýdanynda úsh qabatty ǵımaratqa japsarlas salynǵan qazandyqta gaz-aýa qospasy jaryldy. Bir adam zardap shegip, aýrýhanaǵa jetkizildi.
Oqıǵa búgin tańerteń bolǵan. Jarylystan keıin órt tutanǵan joq. Oqıǵa saldarynan qazandyqtan 12 metr qashyqtyqta ornalasqan kópqabatty turǵyn úıdiń páterlerindegi terezeler men eki jeńil avtokólik zaqymdanǵan.
- Oqıǵa ornynda Tótenshe jaǵdaılar departamentiniń, jergilikti atqarýshy organdardyń, Polıtsııa departamentiniń kúshteri men quraldary, sondaı-aq QR TJM Apattar medıtsınasy ortalyǵynyń qyzmetkerleri jumyldyryldy. Jedel qyzmetter oqıǵa ornyndaǵy jumystardy jalǵastyryp jatyr, - dep habarlady oblystyq TJD baspasóz qyzmeti.
Oqıǵanyń mán-jaıy men sebebi anyqtalyp jatyr.
Buǵan deıin Qazaqstanda bir kúnde eki orman órti tirkelgeni jóninde jazǵan edik.
