Atyraýda jylyna 3 mln jolaýshy qabyldaıtyn jańa termınal salynady
ASTANA. KAZINFORM — Premer-mınıstrdiń birinshi orynbasary Nurlybek Nálibaev Atyraý oblysyna jumys sapary barysynda óńirdegi birqatar strategııalyq mańyzdy ınfraqurylymdyq jobanyń júzege asý barysymen tanysty.
Ol aldymen respýblıkalyq mańyzy bar «Atyraý – Oral» avtokólik jolynyń qurylysymen tanysty. Jóndeý aýmaǵy Batys Qazaqstan oblysynyń shekarasynan bastap Atyraý qalasyna qaraı 94 shaqyrymdy qamtıdy. Bul joba aıasynda joldyń negizin nyǵaıtý, búlingen jerlerdi qalpyna keltirýdi jáne jańa asfalt-beton jabynyn tóseý kózdelgen. Jumysqa 80 arnaıy tehnıka men 65 maman jumyldyrylǵan.
«Atyraý – Oral» avtojoly – oblystyń 720 myńnan astam turǵynyn kólik qatynasymen, sondaı-aq Batys Qazaqstan oblysy arqyly Reseı Federatsııasyna tranzıttik júk tasymalymen qamtamasyz etip kele jatqan negizgi kólik arterııalarynyń biri. Atyraý jáne Batys Qazaqstan oblystary arasynda temirjol qatynasynyń joqtyǵy jobanyń mán-mańyzyn aıqyndaı túsedi, sondyqtan tasjol óńirdiń kóliktik jáne áleýmettik-ekonomıkalyq ınfraqurylymynyń mańyzdy elementi retinde qarastyrylady. Jobany júzege asyrý jumystary 2028 jyly aıaqtalady dep josparlanýda.
Nurlybek Nálibaev joba barysymen tanysyp, jumys qarqynyn jedeldetýdi tapsyrdy. Ol osy oraıda nysandaǵy jumysty birneshe lotqa bólip, onyń kólemine qaraı tórt merdiger uıym tartýdyń múmkindigin qarastyrý keregin aıtty. Sonymen qatar «Oral – Atyraý» avtojolyn qaıta jańǵyrtý máselesin oblys ákimdigimen jáne «QazAvtoJol» UK» AQ-men birge Úkimet otyrysynyń qaraýyna shyǵarý tapsyryldy.
Oblys aýmaǵynda budan da basqa birqatar iri joba júzege asyrylýda. Búginde «Muqyr – Qulsary» avtomobıl jolynyń 1-16 shaqyrymynda qurylys, respýblıkalyq mańyzy bar «Mahambet – Hamıt Erǵalıev» tasjolynyń 10-35 shaqyrymynda ortasha jóndeý jumystary jáne Atyraý qalasyndaǵy 27 shaqyrymdyq Soltústik aınalma joldyń qurylysy júrip jatyr.
Soltústik aınalma jol jobasy boıynsha Jaıyq ózeniniń ústine kópir jáne úsh jolaıryq salý kózdelgen. Jańa magıstral oblys ortalyǵyn syrttaı aınalyp ótip, «Atyraý – Astrahan», «Atyraý – Oral», «Atyraý – Inder» jáne «Atyraý – Aqtóbe» avtomobıl joldaryn ózara baılanystyratyn mańyzdy tranzıt dálizi bolmaq.
Sonymen qatar QR Premer-mınıstriniń birinshi orynbasary Nurlybek Nálibaev H. Dospanova atyndaǵy Halyqaralyq áýejaıǵa baryp, jolaýshylarǵa arnalǵan jańa termınal salý jobasynyń barysymen tanysty. 2025 jyly áýejaıdy jańǵyrtýǵa $50 mln kóleminde ınvestıtsııa tartylǵan. Jobanyń halyqaralyq ınvestory – Qaz Air Investments LLC.
Oblys ákimdigimen aradaǵy kelisimshart boıynsha nysan senimgerlik basqarýǵa berilgen soń jobalaý máseleleri sheshilip, qurylys bastalýy kerek edi. Al ınvestordyń jol kartasynda jobalaýǵa 2026 jylǵy shildede kirisetini jáne jumysty aıaqtaý merzimi 2027 jylǵy jeltoqsanǵa belgilengeni kórsetilgen.
Nurlybek Nálibaev muny synǵa alyp, 1 shildege deıin eskızdik jobany bekitýdi jáne bıylǵy tamyzda qurylys jumystaryn bastaýdy tapsyrdy.
Premer-mınıstrdiń birinshi orynbasary budan ári jumys merzimin sozýǵa jol berilmeıtinin atap ótti. Mindet oryndalmasa, jobany basqa ınvestorǵa berý jóninde másele kóterilmek. Atyraý oblysynyń ákimi Serik Shápkenovke jobanyń júzege asyrylýyn aıryqsha baqylaýǵa alý jáne ekinshi tarap mindettemelerdi oryndamaǵan jaǵdaıda ınvestor tartýdyń balama nusqalaryn qarastyrý tapsyryldy.
Jańa termınal óńirdegi iri ınfraqurylymdyq jobalardyń birine aınalmaq. Nysannyń aýdany – 16,5 myń sharshy metr. Termınal paıdalanýǵa berilgen soń áýejaıdyń ótkizý qabileti 800 myńnan jylyna 3 mln jolaýshyǵa deıin artady. Al bolashaqta 6 mln jolaýshyǵa jetetindeı áleýetke ıe.
Búginde Hıýaz Dospanova atyndaǵy áýejaı «Ashyq aspan» rejıminde jumys isteıdi, munyń halyqaralyq marshrýt jelisin keńeıtýge jáne óńirdiń ınvestıtsııalyq tartymdylyǵyn arttyrýǵa yqpaly zor.
Sondaı-aq Premer-mınıstrdiń birinshi orynbasary Nurlybek Nálibaev Atyraý oblysyndaǵy birqatar strategııalyq mańyzdy nysannyń qurylysymen tanysty. Ol aldymen Qurmanǵazy atyndaǵy 1200 oryndyq jańa kontsert zalynyń qurylys alańyna bardy. Bul keshenniń jalpy aýdany – 50 myń sharshy metr. Qazir munda metall konstrýktsııalaryn montajdaý jumystary aıaqtalýda.
Іri mádenıet nysany Memleket basshysynyń Atyraý oblysyna jumys sapary aıasyndaǵy tapsyrmasy boıynsha boı kóterýde. Nurlybek Nálibaev qurylys alańyna baryp, merdiger uıymdardyń ókilderimen kezdesti. Ol aımaq úshin mańyzy orasan nysandy salýda merdigerlerge zor jaýapkershilik júkteletinin atap ótip, jumys sapasyna qatysty talaptardy qatań saqtaý kerek ekenin basa aıtty. Qurylysty ýaqytynda aıaqtaý boıynsha da naqty tapsyrmalar berildi.
Premer-mınıstrdiń birinshi orynbasary budan keıin 12 myń kórermenge arnalǵan zamanaýı stadıonnyń qurylysymen tanysty. Nysanda qada qaǵý jáne topyraqty daıyndaý jumystary júrip jatyr. Jobany júzege asyrý merzimi – 18 aı. Qurylys 2027 jyldyń sońyna qaraı aıaqtalýy tıis. Jańa nysan óńirdiń sporttyq ınfraqurylymyn damytýǵa jáne buqaralyq sportty qoldaýǵa baǵyttalǵan. Stadıon UEFA IV sanatynyń talaptaryna saı salynady, demek onyń bazasynda halyqaralyq jarystar ótkizýge bolady. Al trıbýna astyna sportshylar men jankúıerlerge arnalǵan fýnktsıonaldy aımaqtar, sonyń ishinde boks, kúres, ıoga, velosport, tennıs jáne basqa da sport túrlerine arnalǵan zaldar salynbaq. Stadıonnyń konstrýktsııalyq erekshelikteri fýtbol oıyndaryn ǵana emes, regbı jáne amerıkalyq aıaqdop jarystaryn ótkizýge de múmkindik beredi.
Aıta ketelik Teńiz ken ornynda táýligine 1 mln barrel munaı óndiriledi.
