Atyraýda jyl sońyna deıin 1100 ıtti aýlaý josparlanyp otyr
ATYRAÝ.KAZINFORM — Atyraý qalasynda maýsym aıynan beri toqtap turǵan buralqy ıtterdi aýlaý jumysy qaıta jalǵasady.
Atyraý qalalyq turǵyn úı-kommýnaldyq sharýashylyǵy jáne turǵyn úı ınspektsııasy bóliminiń málimetinshe, merdigermen kelisimshart jasalǵannan keıin jumys jyl sońyna deıin jalǵasady. Jańa kelisimshart aıasynda 1100 buralqy ıtti aýlaý josparlanǵan.
— Kelisimshart jasalǵannan keıin jumystar jyl sońyna deıin júrgiziledi. Jańa kelisimde qoldanystaǵy zańnamaǵa sáıkes buralqy janýarlardy aýlaý, ýaqytsha kútip ustaý, sterılızatsııalaý jáne qajet bolǵan jaǵdaıda joıý sharalary qarastyrylǵan, — dedi bólimniń sektor meńgerýshisi Eltaı Aıbatov.
Eske salaıyq, buralqy ıtterdi aýlaý jumystary bıylǵy maýsym aıynan beri merdiger uıymmen kelisimsharttyń bolmaýyna baılanysty toqtap qalǵan edi. Úsh aı ishinde 3 myńǵa jýyq buralqy ıt aýlanyp, kózi joıylǵan.
109 biryńǵaı baılanys ortalyǵynyń málimetine sáıkes, ótken jyldyń alǵashqy alty aıynda Atyraý qalasy boıynsha buralqy ıtterge qatysty 4099 shaǵym tirkelgen. Bıyl bul kórsetkish 3 myńnan asqan. Ákimdik ókilderiniń aıtýynsha, kelisimshart rásimdelgennen keıin buralqy ıtterdi aýlaý jumysy qaıta bastalady.
